Muqdisho — Wasiirka Gaashaandhigga Xukuumadda Federaalka Soomaaliya, Mudane Axmed Macallin Fiqi, ayaa maanta xafiiskiisa ku qaabilay Safiirka Jamhuuriyadda Turkiga u fadhiya Soomaaliya, Mudane Alper Aktaş, oo ay wehliyaan Taliyaha Xarunta Tababarka Ciidamada ee TÜRKSOM, Sarreeye Gaas Sebahattin Kalkan, iyo saraakiil sare oo ka tirsan dowladda Turkiga.
Kulanka ayaa diiradda lagu saaray xoojinta xiriirka istiraatiijiyadeed iyo iskaashiga dhinacyada difaaca iyo amniga ee u dhexeeya Soomaaliya iyo Turkiga, iyadoo labada dhinac ay si gaar ah uga wada hadleen dardargelinta tababarrada ciidamada, tayeynta awoodda difaaca dalka, iyo kor u qaadidda wada-shaqeynta milatari ee labada dowladood.
Wasiir Axmed Macallin Fiqi ayaa Dowladda Turkiga uga mahadceliyay taageerada joogtada ah ee ay la garab taagan tahay Dowladda Federaalka Soomaaliya iyo shacabka Soomaaliyeed, isagoo xusay in Turkigu door weyn ka qaatay dib-u-dhiska iyo casriyeynta ciidamada qalabka sida Soomaaliyeed, gaar ahaan dhinacyada tababarka, qalabaynta iyo la dagaallanka kooxaha argagixisada.
Wasiirka ayaa sidoo kale tilmaamay in iskaashiga Soomaaliya iyo Turkiga uu horseeday guulo muuqda oo laga gaaray amniga iyo dib-u-soo kabashada hay’adaha difaaca dalka, isaga oo xusay in dowladda Turkiga ay ka mid tahay saaxiibada ugu muhiimsan ee Soomaaliya ka taageera xasillinta iyo dhismaha dowladnimada.
Dhankiisa, Safiirka Turkiga iyo saraakiisha la socday ayaa adkeeyay sida Dowladda Turkigu uga go’an tahay sii wadidda taageerada ay siiso Soomaaliya, gaar ahaan horumarinta awoodda ciidamada Soomaaliyeed iyo xoojinta iskaashiga labada dal ee ku dhisan walaaltinimo iyo dan wadaag istiraatiiji ah.
Wasiirka Gaashaandhigga ayaa sidoo kale sheegay in ay jiraan kooxo iyo dano ka soo horjeeda geeddi-socodka dowlad-dhiska Soomaaliya, kuwaas oo dhibsada xiriirka sii xoogeysanaya ee u dhexeeya Soomaaliya iyo Turkiga, hase yeeshee wuxuu caddeeyay in dowladda Soomaaliya ay sii wadi doonto xoojinta xiriirrada caalamiga ah ee taageeraya amniga, horumarka iyo xasilloonida dalka.
Kulanka waxaa goob joog ka ahaa Taliyaha Ciidanka Dhulka Soomaaliyeed ahna ku-simaha Taliyaha Ciidanka Xoogga Dalka Soomaaliyeed, Sarreeye Guuto Sahal Cabdullaahi Cumar, iyo masuuliyiin kale oo ka socday labada dhinac.
Waxaa soo tebiyay: Osman Jama
