Toronto, Ontario — Dowladda Ontario ayaa soo jeedisay isbeddello sharci oo lagu adkeynayo kormeerka kaalmada waxbarashada ee OSAP, kaddib markii baaritaan socda uu muujiyay tuhunno ku saabsan musuqmaasuq iyo ku-takrifal ka dhacay kulliyadaha gaarka loo leeyahay.
OSAP waa barnaamij ardayda ka caawiya kharashaadka waxbarashada, isagoo bixiya deeqo iyo amaah.
Wasiirka qaabilsan kulliyadaha iyo jaamacadaha Ontario, Nolan Quinn, ayaa sheegay Khamiistii in natiijooyinka hordhaca ah ee baaritaanku muujiyeen dhibaatooyin baahsan oo walaac gelinaya sida barnaamijka looga isticmaalo xarumahaas.
Waxyaabaha la tuhunsan yahay waxaa ka mid ah dad kale oo ardayda u qabta shaqada koorsooyinka, koorsooyin dhan oo hal maalin lagu dhammeeyay iyo imtixaanno kama dambeys ah oo lagu dhammaystiray lix daqiiqo oo keliya.
Quinn ayaa sidoo kale sheegay in kumannaan codsi oo OSAP ah laga soo diray isla cinwaannada internetka ee IP-ga. Waxaa kale oo la arkay arday aan sheegi karin magaca iskuulkooda, barnaamijka ay ku qoran yihiin ama maaddooyinka ay dhigtaan.
Maxaa la beddelayaa?
Isbeddellada la soo jeediyay waxaa ka mid ah:
- In xad loo sameeyo kororka ardayda OSAP ku dhigata xarumaha gaarka loo leeyahay.
- In barnaamijyada inta badan internetka lagu dhigto laga saaro kuwa u qalma OSAP.
- In kulliyadaha xirfadaha lagu waajibiyo xarun waxbarasho oo jireed.
- In la xaddido xiriirka kulliyadaha iyo shirkadaha socdaalka ama kuwa ardayda u soo raadiya.
- In la adkeeyo hubinta ka-qaybgalka ardayda ee fasallada iyo dhammaystirka shaqada waxbarashada.
Sharciga la soo jeediyay wuxuu sidoo kale dowladda siinayaa awood dheeraad ah oo ay xarumaha gaarka ah uga soo ceshan karto lacagaha OSAP, iyadoo masuuliyad ka saari karta amaahaha ardaydooda. Waxaa kale oo la soo rogayaa ganaaxyo cusub oo la xiriira jebinta sharciga kulliyadaha xirfadaha ee Ontario.
Dowladdu waxay sheegtay in hindise-sharciyeedka la horgeyn doono baarlamaanka gobolka 16-ka Nofeembar. Isbeddelladan weli sharci ma noqon.
Baaritaanka ayaa weli socda
Shirkadda KPMG ayaa wada baaritaanka, kaas oo bishii Oktoobar dhaliyay walaac ku saabsan lacagaha OSAP ee la siiyo kulliyadaha gaarka loo leeyahay. Quinn ayaa natiijooyinka u gudbiyay Hanti-dhowrka Guud iyo Booliska Gobolka Ontario, kuwaas oo dib u eegaya xogta.
Wasiirku wuxuu sheegay in arrintu aysan ku koobnayn khaladaad maamul, balse ay jiraan tuhunno ku saabsan falal abaabulan oo looga faa’iideysanayo ardayda iyo lacagta canshuur-bixiyeyaasha.
Sida uu Quinn sheegay, ururka Career Colleges Ontario ayaa xubinnimada ka saaray 24 xarumood oo kale, halka 13 xarumood ay dib u eegis ku jiraan. Ururku wuxuu sidoo kale walaac ka muujiyay 33 xarumood oo lagu tuhunsan yahay in taariikhaha diiwaangelinta ardayda dib loo celiyay.
Ilaa hadda lama shaacin inta lacag ah ee si aan habboonayn loo qaatay. Baaritaanku weli ma dhammaan.
Goorma ayay ardaydu helayaan lacagtooda?
Dowladda Ontario ayaa bishii Oktoobar hakisay lacagihii OSAP ee xarumaha waxbarashada sare ee gaarka loo leeyahay. Tallaabadan ayaa arday badan ku abuurtay hubanti la’aan ku saabsan bixinta kharashaadkooda iyo sii wadashada waxbarashada.
Quinn wuxuu sheegay inuu rajeynayo in lacag-bixintu dib u bilaabato bilowga sannadka cusub. Hase yeeshee, ma jiro taariikh la xaqiijiyay, maadaama baaritaanka KPMG uu weli socdo.
Wasiirku wuxuu intaas ku daray inuu bangiyada kala hadlayo amaah dulsaar hoose leh oo ardayda ay dhibaatadu saameysay lagu caawiyo inta ay sugayaan. Qorshahaasna weli looma cayimin waqti uu bilaabanayo.
Mucaaradka oo dowladda ku dhaliilay dib-u-dhac
Xisbiyada mucaaradka ayaa sheegay in dowladda ay ahayd inay kormeerka adkeyso ka hor inta aysan dhibaatooyinku heerkan gaarin.
Peggy Sattler, oo xisbiga NDP u qaabilsan arrimaha kulliyadaha, ayaa sheegtay in kormeer wanaagsan loo baahan yahay, balse hakinta lacagaha ay ciqaab ku noqotay ardayda ku tiirsan kaalmada waxbarashada.
Waxay sheegtay inay suurtagal tahay in boqollaal milyan oo doolar si khaldan loo isticmaalay. Hase yeeshee, lacagtaas waa qiyaas ay iyadu soo jeedisay, mana jiro tiro rasmi ah oo la shaaciyay.
Hoggaamiyaha ku-meelgaarka ah ee xisbiga Liberal-ka Ontario, John Fraser, ayaa isaguna sheegay in arday daacad ah iyo qoysaskooda ay dhibaatadu saameysay. Wuxuu ku dhaliilay hindisaha inuusan bixin gargaar degdeg ah oo ardayda ka caawiya kharashaadka hadda saaran iyo badbaadinta sannad-waxbarashadooda.
Labada xisbi midkoodna kama uusan hor imaan suurtagalnimada in la dedejiyo ansixinta sharciga.
Dhanka dowladda, Quinn ayaa sheegay in lacag-bixinta aan dib loo bilaabi doonin ilaa ay dowladdu ku kalsoonaato in lacagta ardayda iyo canshuur-bixiyeyaasha si sax ah loo adeegsanayo.
