Muqdisho — Madaxweynaha Jamhuuriyadda Federaalka Soomaaliya, Xasan Sheekh Maxamuud, ayaa xalay ka qayb galay munaasabad casho sharaf ah oo lagu maamuusay madaxda dowladda, mas’uuliyiinta iyo marti-sharaftii ka soo qaybgashay caleemo-saarka hoggaanka la doortay ee Dowlad Goboleedka Hirshabeelle.
Casho sharaftan ayaa la xiriirtay munaasabadda caleemo-saarka, iyadoo lagu sharfayey madaxda iyo martidii ka qayb qaadatay munaasabaddaas.
Madaxweyne Xasan Sheekh ayaa khudbaddii uu ka jeediyey kulanka diiradda ku saaray muhiimadda midnimada iyo wadajirka, isaga oo ku adkeeyey heerarka kala duwan ee dowladnimada inay xoojiyaan iskaashigooda. Waxa uu tilmaamay in wada-shaqayntu muhiim u tahay dardargelinta dadaallada dowlad-dhiska, amniga iyo horumarka dalka.
Hadalka Madaxweynaha ayaa xoogga saaray xiriirka ka dhexeeya wadajirka iyo horumarka dowladnimada, isaga oo ku baaqay in iskaashiga heerarka dowladda loo adeegsado sidii loo sii ambaqaadi lahaa hawlahaas.
