Muqdisho – Taliyaha Ciidanka Booliiska Soomaaliyeed, Sarreeye Guuto Asad Cismaan Cabdullaahi, ayaa amar adag ku bixiyay in si weyn loo xoojiyo ammaanka Caasimadda Muqdisho, iyadoo la wajahayo xaalado amni oo u baahan feejignaan dheeri ah.
Taliyaha ayaa faray dhammaan saraakiisha iyo cutubyada ka howlgala magaalada inay laba jibbaaraan dadaalladooda sugidda nabadda, isla markaana si gaar ah ula socdaan dhaqdhaqaaq kasta oo keeni kara qalalaase ama rabshado. Wuxuu si cad u sheegay in aan la oggolaan doonin falal amni-darro abuuri kara, gaar ahaan kuwa la xiriira hub sharci darro ah oo lagu dhex wato bulshada.
Wararka ka imanaya hay’adaha ammaanka ayaa tilmaamaya in tallaabooyinkan ay qeyb ka yihiin qorshe ballaaran oo lagu xaqiijinayo badbaadada shacabka iyo xasilloonida guud ee magaalada Muqdisho, xilli ay jiraan dhaq-dhaqaaqyo siyaasadeed iyo baaqyo ku saabsan isu soo baxyo.
Dhanka kale, hay’adaha amniga dowladda Federaalka Soomaaliya ayaa ugu baaqay shacabka Soomaaliyeed inay door muuqda ka qaataan sugidda ammaanka, iyagoo la shaqeynaya ciidamada amniga kana fogaada fal kasta oo keeni kara khatar ama hurin kara rabshado.
“Amniga waa mas’uuliyad wadajir ah,” ayaa lagu yiri bayaan ka soo baxay hay’adaha amniga, iyadoo lagu adkeeyay in iskaashiga bulshada uu yahay furaha ugu weyn ee lagu xaqiijin karo nabad waarta iyo kala dambeyn.
Ugu dambeyn, Taliyaha Booliiska ayaa xaqiijiyay in ciidamadu ay si buuxda uga go’an tahay ilaalinta nolosha iyo hantida shacabka, islamarkaana ay si adag uga hortagi doonaan cid kasta oo isku dayda inay carqaladeyso xasilloonida caasimadda.
