Muqdisho, Maajo 09, 2026 – Guddoomiyaha Maamulka Gobolka Banaadir ahna Duqa Magaalada Muqdisho, Dr. Xasan Maxamed Xuseen (Muungaab), ayaa shir ballaaran oo diiradda lagu saarayay amniga, xasilloonida iyo horumarka Caasimadda ku guddoomiyay Aqalka Dowladda Hoose ee Muqdisho.
Kulankan muhiimka ah ayaa waxaa ka qayb galay Wasiirro, Senetarro, Xildhibaanno, Guddoomiye Ku-xigeenka Amniga iyo Siyaasadda ee Gobolka Banaadir, mas’uuliyiin heer degmo, saraakiil amni, siyaasiyiin, odayaal dhaqan iyo qaybaha kala duwan ee bulshada. Doodaha kulanka ayaa xoogga lagu saaray sidii loo xoojin lahaa amniga magaalada iyo in si wadajir ah looga shaqeeyo xasilloonida guud ee Caasimadda.
Mas’uuliyiinta iyo waxgaradkii ka hadlay kulanka ayaa si cad u muujiyay in Muqdisho ay soo martay xaalado adag oo amni, isla markaana aysan maanta u dulqaadan karin wax kasta oo horseedi kara qalalaase, cabsi gelin ama carqalad ku timaadda ganacsiga, isu socodka iyo adeegyada bulshada.
Waxaa sidoo kale la adkeeyay muhiimadda ay leedahay wadashaqeynta shacabka iyo hay’adaha amniga, iyadoo bulshada loogu baaqay inay muujiyaan feejignaan dheeri ah iyo mas’uuliyad wadajir ah si loo ilaaliyo nabadda iyo kala dambeynta magaalada.
Guddoomiyaha Gobolka Banaadir, Dr. Muungaab, ayaa intii uu hadalka jeedinayay si gaar ah uga hadlay isu soo baxa la qorsheeyay in uu ka dhaco Muqdisho maalinta xigta. Wuxuu xusay in mudaharaadku yahay xuquuq dastuurku dammaanad qaaday, balse ay muhiim tahay in loo maro hab sharciyeed oo nidaamsan, laguna qabto goobaha loo asteeyay isu imaatinnada dadweynaha.
Dhanka kale, wuxuu si adag uga digay isku day kasta oo lagu abuuri karo qalalaase, sida dhisidda dhufeysyo ama xiridda waddooyinka, isagoo carrabka ku adkeeyay in tallaabo kasta oo halis gelin karta amniga iyo xasilloonida bulshada aan la aqbali doonin.
Kulanka ayaa ugu dambeyn kusoo dhammaaday baaq mideysan oo ku wajahan shacabka Muqdisho, kaas oo lagu adkeeyay ilaalinta wadajirka, nabadda iyo dowladnimada, si Caasimaddu u sii ahaato magaalo amni iyo horumar ku tallaabsaneysa.
