Yiwu, China — Wasiirka Ganacsiga iyo Warshadaha Xukuumadda Federaalka Soomaaliya, Gamal Mohamed Hassan, iyo wafdi uu hoggaaminayo ayaa booqasho shaqo ku tagay Xarunta Ganacsiga Dijitaalka ah ee Yiwu (Global Digital Trade Center) iyo qaybaha koowaad iyo labaad ee Suuqa Ganacsiga Caalamiga ah ee magaaladaas, oo ku taalla gobolka Zhejiang ee dalka Shiinaha.
Booqashada ayaa diiradda lagu saaray sidii loo fahmi lahaa adeegsiga tiknoolajiyadda casriga ah ee ganacsiga iyo hababka isku xira warshadaha wax-soo-saarka, ganacsatada iyo suuqyada caalamka. Waxaa soo qabanqaabisay Safaaradda Soomaaliya ee Shiinaha, iyadoo kaashanaysa Dowladda Gobolka Zhejiang, si loo xoojiyo iskaashiga labada dal ee ganacsiga, warshadaynta iyo tiknoolajiyadda.
Duqa magaalada Yiwu iyo mas’uuliyiin ka socday Waaxda Ganacsiga iyo Xafiiska Arrimaha Dibadda ee magaalada ayaa wasiirka iyo wafdigiisa ku weheliyey booqashada. Wafdiga ayaa warbixinno ka dhegeystay mas’uuliyiinta xarumaha, waxaana ay indho-indheeyeen hababka loo adeegsado fududeynta ganacsiga iyo gaarsiinta badeecadaha suuqyada caalamiga ah.
Sida lagu sheegay warbixinta booqashada, Xarunta Ganacsiga Dijitaalka ah ee Yiwu waxay isticmaashaa garaadka macmalka ah (AI), ganacsiga elektaroonigga ah, nidaamyada lacag-bixinta dijitaalka ah iyo adeegyada casriga ah ee gaadiidka iyo saadka. Adeegyadan ayaa ganacsatada ka caawiya xiriirka tooska ah ee macaamiisha caalamka, maaraynta dalabaadka iyo dhimista kharashaadka ganacsiga.
Warbixintu waxay Yiwu ku tilmaantay magaalo aan lahayn khayraad dabiici ah oo la taaban karo, balse horumarkeeda ganacsi ku dhistay isku xirka wax-soo-saarka, suuqyada iyo tiknoolajiyadda. Waxa ay sheegtay in magaaladu xiriir ganacsi la leedahay in ka badan 230 dal iyo deegaan oo caalamka ah.
Waayo-aragnimadaas ayaa warbixinta lagu soo bandhigay inay Soomaaliya u noqon karto tusaale ku saabsan casriyeynta ganacsiga. Adeegsiga adeegyada dijitaalka ah ayaa gacan ka geysan kara ka gudbidda qaar ka mid ah caqabadaha kaabayaasha dhaqaalaha, iyadoo ganacsatada iyo soo-saarayaasha loo fududeyn karo helitaanka suuqyo iyo maaraynta macaamilkooda.
Fursadaha la tilmaamay waxaa ka mid ah horumarinta suuqyada elektaroonigga ah, lacag-bixinta dijitaalka ah iyo adeegyada saadka. Qaybaha beeraha, xoolaha, kalluumaysiga iyo warshadaha ayaa lagu xusay meelaha ay ganacsatada Soomaaliyeed uga faa’iidaysan karaan adeegyadaas.
Booqashadan ayaa qayb ka ah socdaalka shaqo ee wasiirka iyo wafdigiisu ku marayaan gobolka Zhejiang. Waxay daba socotaa Madashii Iskaashiga Ganacsiga iyo Warshadaha Soomaaliya iyo Shiinaha ee 8-dii Nofeembar lagu qabtay Yiwu, taas oo ay ka qaybgaleen ku dhowaad 300 oo mas’uuliyiin, maalgashadayaal iyo ganacsato Soomaaliyeed iyo Shiinays ah.
