Muqdisho, Soomaaliya – May 13, 2026 – Wasiirka cusub ee Wasaaradda Warfaafinta, Dhaqanka iyo Dalxiiska ee Xukuumadda Federaalka Soomaaliya, Mudane Cabdifataax Qaasim Maxamuud, ayaa maanta kormeer shaqo ku maray qeybaha kala duwan iyo waaxyaha Wasaaradda, si uu ugu kuurgalo habsami u socodka howlaha shaqo iyo adeegyada ay Wasaaraddu u hayso shacabka Soomaaliyeed.
Kormeerka Wasiirka ayaa qeyb ka ahaa dadaallada lagu xoojinayo hufnaanta shaqada iyo kor u qaadista waajibaadka muhiimka ah ee Wasaaradda, xilli dowladda Federaalka Soomaaliya ay xoogga saareyso horumarinta warbaahinta Qaranka, wacyigelinta bulshada iyo dib-u-dhiska hay’adaha dowliga ah.
Intii uu kormeerka ku guda jiray, Wasiir Cabdifataax Qaasim Maxamuud ayaa warbixino faahfaahsan ka dhageystay Agaasimayaasha, madaxda waaxyaha iyo howlwadeennada kala duwan ee Wasaaradda, kuwaas oo sharaxaad ka bixiyay howlaha socda, adeegyada la bixiyo iyo qorshayaasha horumarineed ee horyaalla Wasaaradda.
Wasiirka ayaa bogaadiyay dadaalka iyo shaqada ay shaqaalaha Wasaaraddu u hayaan Qaranka Soomaaliyeed, isagoo ku dhiirrigeliyay inay sii labanlaabaan dadaalkooda si loo gaaro adeeg hufan oo waxtar u leh bulshada.
Mudane Cabdifataax ayaa si gaar ah u carrabka ku adkeeyay muhiimadda ay Wasaaradda Warfaafinta u leedahay mideynta farriimaha Dowladda, horumarinta Warbaahinta Qaranka, ilaalinta iyo kobcinta dhaqanka Soomaaliyeed, iyo sidoo kale dhiirrigelinta dalxiiska dalka, oo uu sheegay inuu qeyb muhiim ah ka qaadan karo horumarka dhaqaalaha iyo sumcadda Soomaaliya.
Sidoo kale, Wasiirka cusub ayaa ammaanay doorka muuqda ee Warbaahinta Qaranku ka qaadatay tabinta doorashooyinkii qof iyo codka ahaa ee dhowaan ka dhacay deegaannada Dowlad Goboleedka Koonfur Galbeed, isagoo tilmaamay in warbaahintu door muhiim ah ku leedahay wacyigelinta bulshada iyo xoojinta geeddi-socodka dimuqraadiyadda dalka.
Ugu dambeyn, Wasiirka ayaa ballan qaaday inuu xoogga saari doono dardargelinta howlaha Wasaaradda, casriyeynta adeegyada Warbaahinta Qaranka iyo hirgelinta qorshayaal lagu horumarinayo shaqada Wasaaradda Warfaafinta, Dhaqanka iyo Dalxiiska Soomaaliya.
