Geneva, Switzerland – Wasiirka Wasaaradda Caafimaadka iyo Daryeelka Bulshada ee Xukuumadda Federaalka Soomaaliya, Mudane Dr. Cali Xaaji Aadan, ayaa maanta ka qeyb galay furitaanka rasmiga ah ee Shirweynaha 79-aad ee Caafimaadka Adduunka (World Health Assembly), kaas oo ka furmay magaalada Geneva ee dalka Switzerland.
Shirkan caalamiga ah oo ay sanad walba isugu yimaadaan wasiirrada caafimaadka, khubaro caafimaad, hay’adaha samafalka iyo madaxda ururrada caafimaadka ee caalamka, ayaa sanadkan diiradda lagu saarayaa xoojinta nidaamyada daryeelka caafimaadka, kor u qaadidda iskaashiga caalamiga ah, iyo dejinta istaraatiijiyado wax looga qabanayo caqabadaha caafimaad ee dunida ka jira.
Wasiirka waxaa safarkiisa ku wehlinaya Xoghayaha Guud ee Golaha Mihnadlayaasha Caafimaadka Soomaaliyeed, Mudane Maxamed Maxamuud Adoow, iyo wafdi ballaaran oo ka kooban agaasime-waaxeedyo iyo howl-wadeenno ka tirsan Wasaaradda Caafimaadka iyo Daryeelka Bulshada. Wafdigan ayaa matalaya Jamhuuriyadda Federaalka Soomaaliya, iyagoo ka qeyb geli doona doodaha muhiimka ah, kulamada doceedyada iyo go’aannada la xiriira horumarinta caafimaadka caalamiga ah.
Ka qeybgalka Soomaaliya ee shirkan ayaa muujinaya dadaalka dowladda Federaalka Soomaaliya ay ugu jirto dib-u-dhiska iyo horumarinta adeegyada caafimaadka dalka, gaar ahaan xoojinta xiriirka iyo wada-shaqeynta hay’adaha caafimaadka ee caalamiga ah.
Sidoo kale, shirkan ayaa Soomaaliya u ah fursad muhiim ah oo ay kula wadaagi karto caalamka horumarka laga sameeyay adeegyada caafimaadka, dib-u-habeynta nidaamka caafimaadka dalka, iyo qorshayaasha lagu xoojinayo tayada adeegyada caafimaad ee bulshada Soomaaliyeed.
Wasaaradda Caafimaadka iyo Daryeelka Bulshada XFS ayaa markale xaqiijisay sida ay uga go’an tahay horumarinta adeegyada caafimaadka, tayeynta xirfadlayaasha caafimaadka, iyo ka qeyb qaadashada madalaha caalamiga ah ee looga arrinsanayo caafimaadka adduunka.
Waxaa soo tebiyay: Osman Jama
