Ergeyga Gaarka ah ee Madaxweynaha Jamhuuriyadda Federaalka Soomaaliya u qaabilsan Ka-hortagga iyo La-dagaallanka Fikradaha Xagjirka Rabshadaha Wata, Mudane Xildhibaan Aweys Maxamed Cumar, ayaa ka qeyb galay shir caalami ah oo muhiim ah oo lagu qabtay magaalada Madrid ee caasimadda dalka Spain, kaas oo diiradda lagu saaray xoojinta iskaashiga caalamiga ah ee la dagaallanka argagixisada ee qaaradda Afrika.
Shirka oo cinwaankiisu ahaa “Iskaashiga La-dagaallanka Argagixisada ee Afrika” ayaa waxaa ka qeyb galay masuuliyiin heer sare ah, khubaro amni, wakiillo dowladeed iyo hay’ado caalami ah oo ka kala socday dalal badan oo Afrika iyo Yurub ah. Kulanka ayaa xoogga lagu saaray sidii loo mideyn lahaa dadaallada lagula dagaallamayo kooxaha xagjirka ah iyo sidii looga hortagi lahaa faafitaanka fikiradaha rabshadaha wata ee khatarta ku ah amniga iyo xasilloonida gobolka.
Intii uu socday shirka, Ergeyga Madaxweynaha Soomaaliya Mudane Aweys Maxamed Cumar ayaa ugu horreyn uga mahadceliyay Dowladda Spain iyo qabanqaabiyeyaasha shirka martigelinta iyo dadaallada ay ku bixinayaan abuurista madal muhiim ah oo lagu xoojinayo wada-hadalka iyo iskaashiga dhinaca amniga iyo la dagaallanka argagixisada.
Khudbad uu ka jeediyay madasha shirka ayuu Ergeygu si qoto dheer uga hadlay xaaladda Soomaaliya iyo caqabadaha ay kooxaha xagjirka ahi ku hayaan shacabka Soomaaliyeed iyo dowladnimada dalka. Wuxuu sheegay in Soomaaliya aysan arrintan u arkin oo keliya dood siyaasadeed ama aragti la iska falanqeeyo, balse ay tahay xaalad dhab ah oo muddo dheer saameyn ku yeelatay amniga, horumarka iyo nolosha bulshada Soomaaliyeed.
Mudane Aweys Maxamed Cumar ayaa tilmaamay in kooxaha xagjirka ahi ay sannadihii lasoo dhaafay adeegsanayeen farsamooyin casri ah iyo tiknoolajiyad horumarsan si ay u faafiyaan dacaayadahooda, u marin habaabiyaan dhalinyarada, isla markaana uga faa’iideystaan baraha bulshada iyo aaladaha dijitaalka ah.
Wuxuu sidoo kale carrabka ku adkeeyay muhiimadda ay leedahay in dowladaha Afrika iyo beesha caalamku yeeshaan iskaashi xooggan oo dhinaca xog-wadaagga, tiknoolajiyadda iyo wacyigelinta bulshada ah, si looga hortago halista sii kordheysa ee xagjirnimada iyo argagixisada.
Shirkan ka dhacay Madrid ayaa imanaya xilli ay dowlado badan oo Afrika ah xoojinayaan dadaallada amniga iyo la dagaallanka kooxaha hubeysan, iyadoo Soomaaliya ay safka hore kaga jirto dalalka sida tooska ah ula dagaallamaya kooxaha xagjirka ah ee gobolka ka howlgala.
Ka qeybgalka Soomaaliya ee shirkan ayaa muujinaya doorka firfircoon ee ay Dowladda Federaalka Soomaaliya ka qaadaneyso dadaallada caalamiga ah ee lagu sugayo amniga, laguna ciribtirayo fikiradaha xagjirka ah ee khatarta ku ah bulshada iyo dowladnimada.
