Muqdisho – May 11, 2026 – Safiirka Dowladda Sudan u fadhiya Soomaaliya, Mudane Abdelrahman Khalil Afandi, ayaa maanta booqasho iyo salaan sharafeed ku tegay Ugaas Abdirizak Ugaas Abdullahi Ugaas Xaashi Ugaas Faracade, oo bulshada Soomaaliyeed si weyn ugu taqaan “Ugaas Mideeye”.
Kulanka oo ku qabsoomay jawi is-xushmad, is-afgarad iyo soo dhoweyn diirran leh ayaa diiradda lagu saaray muhiimadda ay leedahay xoojinta midnimada iyo wadajirka bulshada Soomaaliyeed, gaar ahaan kaalinta hoggaanka dhaqanka ay ku leeyihiin nabadda, dib-u-heshiisiinta iyo horumarka dalka.
Safiirka Dowladda Suudaan ayaa uga mahadceliyay Ugaaska sida wanaagsan ee loo soo dhoweeyay, isagoo bogaadiyay doorka muuqda ee uu ku leeyahay mideynta bulshada iyo dhiirrigelinta wada noolaanshaha shacabka Soomaaliyeed. Waxa uu tilmaamay in hoggaanka dhaqanku uu laf-dhabar u yahay xasilloonida bulshada iyo xal u helidda khilaafaadka.
Dhankiisa, Ugaas “Mideeye” ayaa si diirran u soo dhaweeyay safiirka, isagoo ammaanay xiriirka taariikhiga ah ee ka dhexeeya shacabka Soomaaliyeed iyo reer Suudaan. Ugaaska ayaa sidoo kale bogaadiyay dadaallada diblomaasiyadeed ee ay safaaradda Suudaan ka waddo Soomaaliya, gaar ahaan taageerada iyo adeegyada loo fidiyo Soomaalida ku nool dalka Sudan.
Labada dhinac ayaa sidoo kale ka wada hadlay muhiimadda iskaashiga, wada hadalka iyo xoojinta xiriirka walaaltinimo ee u dhexeeya labada shacab, iyadoo kulanka uu kusoo dhammaaday is-afgarad iyo ballanqaad ku aaddan sii xoojinta wada shaqeynta iyo nabadeynta bulshada Soomaaliyeed.
