Muqdisho (Qaranimo Online) – Ra’iisul Wasaaraha Xukuumadda Federaalka Soomaaliya, Mudane Xamsa Cabdi Barre, ayaa xafiiskiisa ku qaabilay saddex arday oo Soomaaliyeed oo kaalmaha koowaad, labaad iyo saddexaad ka galay tartan caalami ah oo lagu tartamayay xifdinta iyo akhrinta Qur’aanka Kariimka ah, kaas oo dhowaan lagu qabtay dalka Qatar.
Tartankan ayaa waxaa ka qaybgalay 398 arday oo ka kala socday 20 waddan. Ardayda Soomaaliyeed ayaa si weyn uga dhex muuqday tartamayaasha, iyagoo ku guuleystay dhammaan saddexda kaalmood ee ugu sarreeya.
Qaari Cabdulqani Cabdulqaadir Sheekh Xuseen ayaa galay kaalinta koowaad, halka Qaari Cabdiraxmaan Qaasim Maxamed uu ku guuleystay kaalinta labaad. Qaari Cabdiraxmaan Axmed Maxamuud ayaa isaguna galay kaalinta saddexaad. Ka qaybgalka ardayda Soomaaliyeed ee tartanka waxaa fududeysay hay’adda Qatar Charity. SONNA
Ra’iisul Wasaare Xamsa Cabdi Barre ayaa ardayda ugu hambalyeeyay guusha taariikhiga ah ee ay u soo hoyeen Soomaaliya, isaga oo ku ammaanay dadaalkooda, dulqaadkooda iyo waqtiga ay geliyeen barashada iyo xifdinta Qur’aanka Kariimka ah.
Ra’iisul Wasaaraha ayaa sheegay in kaalmaha ay ardaydu ka galeen tartankan caalamiga ahi ay sharaf iyo sumcad u tahay guud ahaan shacabka Soomaaliyeed. Waxa uu sidoo kale ku dhiirrigeliyay inay sii xoojiyaan aqoontooda, isla markaana wixii ay barteen uga faa’iideeyaan ardayda kale.
“Waxaan madaxda dowladda ahaan ku faraxsanahay inaad kaalmaha koowaad, labaad iyo saddexaad ka gasheen tartan caalami ah. Waa guul weyn iyo sharaf u soo hoyatay bulshada Soomaaliyeed,” ayuu yiri Ra’iisul Wasaare Xamsa.
Intii uu kulanku socday, Ra’iisul Wasaaraha ayaa ballanqaaday in Dowladda Federaalka Soomaaliya ay saddexda arday u fidin doonto waxbarasho bilaash ah. Waxa uu Wasaaradda Waxbarashada, Hiddaha iyo Tacliinta Sare faray inay qaaddo tallaabooyinka lagama maarmaanka ah ee lagu daboolayo waxbarashadooda.
Taageeradan ayaa la jaanqaadaysa dhiirrigelinta ay dowladdu siiso ardayda Soomaaliyeed ee kaalmaha sare ka gala imtixaannada qaranka iyo tartamada aqooneed ee heer caalami.
Guusha saddexdan arday ayaa muujinaysa kartida dhallinyarada Soomaaliyeed iyo kaalinta muhiimka ah ee dugsiyada Qur’aanka, macallimiinta iyo waalidiintu ku leeyihiin barbaarinta jiil ku dhisan aqoon, akhlaaq iyo ku-dhaqanka diinta Islaamka. Waxay sidoo kale dhiirrigelin u tahay ardayda kale ee Soomaaliyeed ee ku hawlan barashada, xifdinta iyo fahamka Qur’aanka Kariimka ah.
