Muqdisho, Soomaaliya – May 13, 2026 – Kulan ballaaran oo isugu jiray isbarasho, wacyigelin iyo diyaar-garowga gudashada waajibaadka Xajka ayaa loo qabtay qaar kamid ah xujeyda Soomaaliyeed ee sanadkan 1447 Hijriya / 2026 u safraya Dalka Sacuudiga.
Kulanka oo ay kasoo qeyb galeen culumaa’udiin, masuuliyiin, hagayaal xaj iyo boqolaal xujey ah ayaa diiradda lagu saaray sidii xujeyda loo siin lahaa faham buuxa oo ku saabsan axkaamka Xajka, habraacyada safarka, caafimaadka, amniga iyo muhiimadda ay leedahay in la ilaaliyo anshaxa iyo midnimada bulshada Soomaaliyeed inta lagu guda jiro gudashada cibaadada.
Mas’uuliyiinta iyo culimada ka hadlay munaasabadda ayaa xujeyda kula dardaarmay inay muujiyaan akhlaaq wanaagsan, samir iyo wadajir, maadaama Xajku yahay cibaado weyn oo u baahan dulqaad, nidaam iyo iskaashi.
Waxaa sidoo kale kulanka lagu faahfaahiyay tallaabooyinka kala duwan ee la xiriira safarka xajka, sida habka socdaalka, jadwalka gudashada acmaasha Xajka, ilaalinta caafimaadka, iyo sidii xujeydu uga fogaan lahaayeen wax kasta oo carqaladeyn kara waajibaadkooda diimeed.
Qaar kamid ah culimada muxaadarooyinka bixiyay ayaa xujeyda ku booriyay inay ka faa’iideystaan fursadda barakeysan ee ay heleen, iyagoo xusay muhiimadda ay leedahay in qofku niyaddiisa iyo dhaqankiisaba u diyaariyo gudashada waajibaadka shanaad ee Islaamka.
Kulanka ayaa sidoo kale ahaa madal ay xujeydu isku bartaan, isku xog wareystaan isla markaana ay ku helaan talooyin muhiim ah oo la xiriira safarkooda iyo nolosha ay kula kulmi doonaan goobaha barakeysan ee Makka iyo Madiina.
Dadkii kasoo qeyb galay munaasabadda ayaa muujiyay sida ay ugu faraxsan yihiin diyaar-garowga iyo wacyigelinta loo sameeyay, iyagoo tilmaamay in kulamada noocan oo kale ah ay door weyn ka qaataan fududeynta safarka xajka iyo sare u qaadista fahamka diinta.
Kulankan wacyigelinta ah ayaa kusoo aadaya xilli ay si xowli ah u socdaan diyaar-garowga safarrada xujeyda Soomaaliyeed ee sanadkan, iyadoo la filayo in kumannaan qof ay sanadkan u ambabaxaan gudashada waajibaadka Xajka.
