Muqdisho – Guddoomiyaha Maxkamadda Sare ee Jamhuuriyadda Federaalka Soomaaliya, Garyaqaan Ibraahim Iidle Sulaymaan, ayaa shaqaalaha iyo garsoorayaasha maxkamadda kula yeeshay kulan is-xogwareysi ah oo diiradda lagu saaray habsami-u-socodka shaqada, tayaynta maamulka iyo horumarinta adeegyada garsoorka.
Guddoomiyaha ayaa hadalkiisa ku bilaabay muhiimadda ay leedahay hufnaanta maamulka iyo in qof kasta uu si buuxda u guto waajibaadka shaqo ee saaran. Waxa uu shaqaalaha iyo garsoorayaasha ku boorriyey inay hawlahooda ku saleeyaan daacadnimo, xilkasnimo iyo ilaalinta anshaxa shaqada.
Dardaaranka Guddoomiyaha ayaa sidoo kale xoogga saaray masuuliyadda qof kasta ka saaran shaqada maxkamadda. Waxa uu ku adkeeyey shaqaalaha iyo garsoorayaasha inay muujiyaan hab-dhaqan shaqo oo wanaagsan, isla markaana ay xil gaar ah iska saaraan gudashada waajibaadkooda.
Dhanka maamulka, Garyaqaan Ibraahim Iidle Sulaymaan ayaa carrabka ku adkeeyey baahida loo qabo xoojinta wada-shaqaynta iyo is-fahamka waaxyaha kala duwan ee Maxkamadda Sare. Waxa uu tilmaamay muhiimadda isku-duwidda hawlaha, si shaqadu ugu socoto hab nidaamsan oo hufan.
Guddoomiyaha ayaa isku xiray horumarinta wada-shaqaynta gudaha maxkamadda, tayaynta adeegyada garsoorka iyo xoojinta kalsoonida bulshada ee hay’adda garsoorka. Arrimahaas ayaa ka mid ahaa qodobbada muhiimka ah ee uu ku boorriyey shaqaalaha iyo garsoorayaasha inay mudnaan siiyaan.
Gabagabadii kulanka, Guddoomiyaha ayaa dhammaan shaqaalaha iyo garsoorayaasha ugu baaqay inay ilaaliyaan sumcadda iyo karaamada Maxkamadda Sare. Waxa uu ku adkeeyey inay muujiyaan anshax iyo masuuliyad shaqo oo ku dayasho mudan, kana tarjumaya waajibaadka ay u hayaan hay’adda iyo bulshada.
