Muqdisho — Guddiga Dhaqaalaha, Maaliyadda, Ganacsiga, Warshadaha, Isgaarsiinta iyo Dalxiiska ee Aqalka Sare ee Baarlamaanka Federaalka Soomaaliya ayaa maanta xafiiskiisa ku qaabilay wafdi ka socday Wasaaradda Maaliyadda, oo uu hoggaaminayay Wasiir-ku-xigeenka Wasaaradda, Mudane Cabdiqafaar Cilmi Xaange. Kulanka, oo uu shir-guddoominayay Guddoomiyaha Guddiga, Sanatar Cabdi Axmed Dhuxulow (Dhagdheer), ayaa diiradda lagu saaray Hindise-sharciyeedka Wax-ka-beddelka Sharciga Bankiga Dhexe, tirsigiisuna yahay 130 ee sannadkii 2012.
Ujeeddada kulanka ayaa ahayd in mas’uuliyiinta Wasaaradda Maaliyaddu ay guddiga siiyaan faahfaahin iyo fasiraad dheeraad ah oo ku saabsan hindise-sharciyeedka. Waxaa si gaar ah xoogga loo saaray ereybixinta ku jirta sharciga iyo caddaynta macnaha erayada loo adeegsaday qodobbadiisa.
Faahfaahinta laga dalbaday wasaaradda ayaa loogu talagalay in xubnaha guddigu ay helaan xog iyo faham ku filan oo ka caawiya dib-u-eegista, sixitaanka iyo turxaan-bixinta hindise-sharciyeedka. Caddaynta ereybixinta ayaa qayb ka ah hubinta in qodobbada sharcigu yeeshaan macne cad oo si sax ah loo fahmi karo.
Kulankan ayaa qayb ka ah hawsha guddigu ku gudanayo waajibaadkiisa dastuuriga ah ee la xiriira ka baaraandegidda hindise-sharciyeedyada horyaalla, iyadoo mas’uuliyiinta hay’adaha ay khusayso laga helayo sharaxaadda lagama maarmaanka u ah dib-u-eegistooda.
