Muqdisho — Qaranimo Online — 17-ka Sebtembar 2026 – Guddoomiyaha Golaha Shacabka ee Baarlamaanka Jamhuuriyadda Federaalka Soomaaliya, Mudane Cabdulqaadir Maxamed Nuur (Jaamac), ayaa maanta shir-guddoomiyey kulanka 7-aad ee Guddiga Joogtada ah ee Golaha Shacabka, kaas oo lagu qabtay Xarunta Guddoonka iyo Guddiyada ee Villa Hargeysa.
Kulanka ayaa diiradda lagu saaray dardargelinta howlaha sharci-dejinta, xaaladda hindise-sharciyeedyada horyaalla guddiyada kala duwan iyo dejinta ajandaha kulamada guud ee Golaha Shacabka ee toddobaadka soo socda.
Guddoomiye Cabdulqaadir Maxamed Nuur ayaa furitaanka kulanka ku bogaadiyey xubnaha Guddiga Joogtada ah dadaalka ay ku bixinayaan gudashada waajibaadkooda dastuuriga ah iyo horumarinta howlaha Golaha.
Guddoomiyaha ayaa adkeeyey muhiimadda ay leedahay in hawlaha sharci-dejinta loo fuliyo si qorsheysan, hufan oo waafaqsan habraacyada Golaha Shacabka, si hindise-sharciyeedyada muhiimka ah loogu gudbiyo fadhiyada guud waqtiga loogu talagalay.
Warbixin ku saabsan hindise-sharciyeedyada
Xoghayaha Guud ee Golaha Shacabka, Mudane Cabdiraxmaan Maxamed Cabdulle (Jaabiri), ayaa xubnaha Guddiga Joogtada ah u soo bandhigay warbixin faahfaahsan oo ku saabsan hindise-sharciyeedyada horyaalla guddiyada Golaha.
Warbixinta ayaa lagu soo bandhigay marxaladaha kala duwan ee ay marayaan hindise-sharciyeedyadu, howlaha ay qabteen guddiyada loo xil-saaray iyo waqtiga la qorsheeyey in qaar ka mid ah hindiseyaasha loo gudbiyo fadhiyada guud si looga yeesho dood iyo go’aan.
Waxaa sidoo kale lagu falanqeeyey caqabadaha dib u dhigi kara howlaha sharci-dejinta iyo tallaabooyinka loo baahan yahay in la qaado si loo xaqiijiyo in guddiyadu shaqadooda ku dhammeeyaan jadwalka loo dejiyey.
Xubnaha Guddiga Joogtada ah ayaa aragtiyo iyo talooyin ka dhiibtay warbixinta, iyagoo carrabka ku adkeeyey muhiimadda isku-duwidda guddiyada, xoghaynta iyo hoggaanka Golaha Shacabka.
Ajandaha kulamada guud
Guddiga Joogtada ah ayaa kulanka ku dejiyey ajandaha iyo jadwalka kulamada guud ee Golaha Shacabka ee toddobaadka soo socda. Ajandahan ayaa hagaya qodobbada loo soo bandhigi doono xildhibaannada iyo howlaha mudnaanta leh ee Golaha horyaalla.
Dejinta jadwalka kulamada guud waxay qayb ka tahay mas’uuliyadda Guddiga Joogtada ah ee ku aaddan isku-duwidda shaqada Golaha iyo xaqiijinta in doodaha, akhrinta hindise-sharciyeedyada iyo go’aannada kale ay u dhacaan si nidaamsan.
Xubnaha guddiga ayaa sidoo kale ansixiyey hadal-qoraalkii kulankii 6-aad ee Guddiga Joogtada ah, kaddib markii dib loo eegay qodobbadii iyo go’aannadii kasoo baxay kulankaas.
Guddoomiyaha Golaha Shacabka ayaa gabagabadii kulanka xubnaha guddiga ku boorriyey inay sii xoojiyaan dadaallada lagu dardargelinayo howlaha sharci-dejinta, ilaalinta waajibaadka dastuuriga ah iyo kor u qaadidda hufnaanta shaqada Baarlamaanka.
Wuxuu sidoo kale ku adkeeyey in howlaha Golaha Shacabka loo fuliyo si waafaqsan qorshayaasha shaqo, habraacyada baarlamaanka iyo mas’uuliyadda ka saaran matalaadda shacabka Soomaaliyeed.
