Muqdisho — Golaha Wasiirrada Xukuumadda Federaalka Soomaaliya ayaa kulan gaar ah ku ansixiyey miisaaniyadda dowladda ee sannadka 2027, taas oo dhan 1,259,238,253 doollar. Kulanka ayaa sidoo kale lagu falanqeeyey xaaladda amniga dalka, hawlgallada ciidamada qalabka sida iyo arrimo la xiriira maamulka hay’adaha dowladda.
Shirka waxaa guddoomiyey Ku-simaha Ra’iisul Wasaaraha, ahna Ra’iisul Wasaare Ku-xigeenka Xukuumadda Federaalka Soomaaliya, Saalax Axmed Jaamac. Ansixinta miisaaniyadda ayaa ka mid ahayd qodobbada ugu waaweyn ee goluhu kaga dooday kulankan gaarka ah.
Warbixin laga dhageystay xaaladda amniga
Wasaaradda Amniga Gudaha ayaa Golaha Wasiirrada u soo bandhigtay warbixin ku saabsan xaaladda amniga iyo hawlgallada ay ciidamada qalabka sida ka wadaan deegaannada ay kula dagaallamayaan kooxaha hubeysan ee dowladda ka soo horjeeda.
Warbixinta ayaa lagu faahfaahiyey guulo ay wasaaraddu sheegtay in ciidamadu gaareen maalmihii u dambeeyey, iyadoo sidoo kale laga hadlay hawlgallada socda iyo dadaallada lagu xoojinayo amniga dalka.
Agaasime loo magacaabay Hay’adda Liiltirka iyo Hawlgabka
Golaha Wasiirrada ayaa kulanka ku magacaabay Shukri Xasan Cusmaan inay noqoto Agaasimaha Hay’adda Liiltirka iyo Hawlgabka Shaqaalaha Rayidka ah.
Magacaabistan ayaa timid kaddib soo jeedin uu golaha u gudbiyey Wasiirka Shaqada iyo Arrimaha Bulshada, waxaana lagu ansixiyey kulanka.
Golaha oo bogaadiyey doorkii Xafiiska Siyaasadda ee Qaramada Midoobay
Dhanka kale, Golaha Wasiirrada ayaa soo dhoweeyey soo afjaridda shaqadii Xafiiska Siyaasadda ee Qaramada Midoobay ee Soomaaliya, taas oo goluhu ku tilmaamay mid si guul iyo nabad ah ku dhammaatay.
Golaha ayaa bogaadiyey kaalintii uu xafiisku ka qaatay taageerada Soomaaliya muddadii kala-guurka iyo dib-u-soo-kabashada qaranka. Waxa uu sidoo kale xusay doorkii xafiiska ee dadaallada lagu xoojinayey hay’adaha dowladda iyo awoodda Soomaaliya ay ugu madax-bannaanaanayso maaraynta arrimaheeda.
Kulankan ayaa sidaas ku soo gebageboobay ansixinta miisaaniyadda sannadka 2027, magacaabista hoggaanka hay’adda hawlgabka shaqaalaha rayidka ah iyo dib-u-eegista xaaladda amniga dalka.
