Wasiirka Gaashaandhigga Dowladda Federaalka Soomaaliya, Axmed Macallin Fiqi, iyo Taliyaha Ciidanka Xoogga Dalka Soomaaliyeed, Sarreeye Guuto Ibraahim Maxamed Maxamuud, ayaa maanta kormeer ku tegay Dugsiga Tababarka Ciidanka ee Qorilow, oo ku yaalla gobolka Shabeellaha Dhexe.
Intii lagu guda jiray booqashada, wasiirka ayaa la kulmay ciidamada tababarka ku jira, isagoo ku dhiirrigeliyey inay sii laba jibbaaraan dadaalkooda, korna u qaadaan tayada tababarka, anshaxa iyo u-diyaargarowga howlgalada amniga.
Sidoo kale, wasiirku wuxuu sheegay in dowladda Federaalka ay mudnaan siinayso horumarinta awoodda iyo tayeynta Ciidanka Xoogga Dalka, si loo xoojiyo amniga iyo xasilloonida guud ee Soomaaliya.
Dhankiisa, Taliyaha Ciidanka Xoogga Dalka Soomaaliyeed, Sarreeye Guuto Ibraahim Maxamed Maxamuud, ayaa ciidamada ku boorriyey inay si buuxda uga faa’iidaystaan tababarka ay qaadanayaan, isla markaana muujiyaan feejignaan, isku-duubni iyo heegan joogto ah.
Taliyaha ayaa sidoo kale xusay in ciidamada lagu tababarayo Dugsiga Qorilow la filayo inay door ka qaataan howlgalada la qorsheynayo ee ka dhanka ah kooxda Al-Shabaab, isagoo tilmaamay in diyaar-garowga socda uu qayb ka yahay qorshaha lagu xoojinayo awoodda ciidamada.
Booqashadan ayaa imanaysa xilli ay dowladda Federaalka Soomaaliya waddo dadaallo lagu xoojinayo diyaar-garowga ciidamada, iyadoo la filayo wejiyo cusub oo howlgalo amni ah laga fuliyo deegaannada ay weli ka jiraan khataraha amni.
