Salvador, Brazil | September 12, 2026 — Agaasimaha Fulinta Sanduuqa Qaran ee Isbeddelka Cimilada Soomaaliya, Mudane Liban Obsiye, ayaa magaalada Salvador ee dalka Brazil uga qaybgalay shir goboleed ay yeesheen wasaaradaha maaliyadda, kaas oo diiradda lagu saaray maalgelinta wax-ka-qabashada isbeddelka cimilada. Shirka waxaa isugu yimid mas’uuliyiin iyo khubaro ka kala socday dalal ku yaalla Afrika iyo Koonfurta Ameerika.
Kulanka oo socday saddex maalmood ayaa ka qaybgalayaashu ku wadaageen khibrado iyo fikrado ku saabsan sidii loo abaabuli lahaa dhaqaale dheeraad ah oo lagu taageero dadaallada cimilada. Waxa kale oo ay ka doodeen caqabadaha dalalka, gaar ahaan kuwa nugul, ka haysta helitaanka maalgelintaas.
Qodobbada la gorfeeyay waxaa ka mid ahaa adeegsiga dakhliga gudaha, iskaashiga dowladda iyo ganacsiga gaarka loo leeyahay (PPP), iyo hababka maalgelinta ee la xiriira maareynta khataraha. Shirka ayaa sidoo kale lagu falanqeeyay iskaashiga heer gobol, dhaqaalaha cagaaran iyo sidii dalalku isu dhaafsan lahaayeen waayo-aragnimada ay u leeyihiin maalgelinta cimilada.
Mudane Liban Obsiye ayaa ka qaybgalayaasha la wadaagay khibradda Soomaaliya, isagoo ka hadlay guulaha la gaaray, caqabadaha weli jira iyo baahida loo qabo in maalgelinta cimilada si wax-ku-ool ah loogu jiheeyo dalalka ay saameyntu sida weyn u gaartay.
“Soomaaliya oo ka mid ah dalalka sida weyn ugu nugul saameynta isbeddelka cimilada, waxaan fursad u helay inaan la wadaago khibraddeenna, guulaheenna iyo caqabadaha naga haysta maalgelinta cimilada,” ayuu yiri Agaasimaha Fulinta Sanduuqa Qaran ee Isbeddelka Cimilada Soomaaliya.
“Waxaan sidoo kale sharaxay sida ay dowladda iyo bulshadu si wadajir ah uga qayb qaataan xoojinta adkeysiga iyo dhisidda mustaqbal waara,” ayuu raaciyay.
Ka qaybgalayaashu waxay intaas dheer ku nuuxnuuxsadeen muhiimadda iskaashiga caalamiga ah, hal-abuurka iyo wadaagista khibradaha si loo kordhiyo maalgelinta, loona helo xalal waara oo lagula tacaalo isbeddelka cimilada.
Shirkan oo ahaa meertadii labaad waxaa si wadajir ah u soo qabanqaabiyay Hay’adda Horumarinta Faransiiska, Wasaaradda Maaliyadda Brazil, Bangiga Horumarinta Ameerikada (IDB), iyo Machadka Dhaqaalaha Cimilada (Institute for Climate Economics).
