Beijing — Qaranimo Online — 17-ka Sebtembar 2026 – Wasiirka Gaashaandhigga Jamhuuriyadda Federaalka Soomaaliya, Mudane Axmed Macallin Fiqi, iyo wafdi uu hoggaaminayo ayaa ka qaybgalay munaasabadda furitaanka Madasha 13-aad ee Beijing Xiangshan, oo lagu qabtay magaalada Beijing ee Jamhuuriyadda Dadka Shiinaha.
Madashan caalamiga ah ayaa isu keentay wasiirrada gaashaandhigga, taliyeyaasha ciidamada, madaxda hay’adaha amniga, diblomaasiyiin iyo khubaro ka kala socda dalal badan. Ka qaybgalayaashu waxay ka arrinsanayaan caqabadaha amni ee dunida, ilaalinta nabadda, iskaashiga difaaca iyo sidii loo xoojin lahaa wada-hadalka caalamiga ah.
Ka qaybgalka wafdiga Soomaaliya ayaa muujinaya dadaallada Dowladda Federaalka ay ugu jirto ballaarinta iskaashiga difaaca iyo amniga, iyadoo dalka uu sii xoojinayo awoodda Ciidamada Qalabka Sida iyo dagaalka ka dhanka ah kooxaha argagixisada.
Soomaaliya oo ka hadlaysa nabadda iyo amniga
Inta ay socoto Madasha Beijing Xiangshan, waxaa sidoo kale la qabanayaa Madasha 4-aad ee Shiinaha iyo Afrika ee Nabadda iyo Amniga. Wasiir Axmed Macallin Fiqi ayaa lagu wadaa inuu madashaas ka jeediyo khudbad uu kaga hadlayo horumarka ay Soomaaliya ka samaysay dhinacyada nabadda iyo amniga, dib-u-dhiska ciidamada iyo dadaallada lagula dagaallamayo argagixisada.
Wasiirka ayaa sidoo kale soo bandhigi doona aragtida Soomaaliya ee ku saabsan iskaashiga amni ee Afrika iyo Shiinaha, gaar ahaan tababarka ciidamada, horumarinta xirfadaha, taageerada farsamo iyo dhismaha hay’ado difaac oo awood u leh ilaalinta madax-bannaanida iyo amniga qaranka.
Soomaaliya waxay muhiimad gaar ah siinaysaa in taageerada saaxiibbada caalamiga ah lagu saleeyo baahiyaha iyo mudnaanta amni ee dalka. Taasi waxaa ka mid ah tayeynta ciidamada, casriyeynta qalabka iyo nidaamyada difaaca, sare u qaadidda tababarrada iyo xoojinta awoodda ay hay’adaha qaranku ugu diyaargaroobayaan mas’uuliyadda buuxda ee amniga dalka.
Kulamo laba geesood ah
Wasiir Axmed Macallin Fiqi iyo wafdigiisa ayaa inta ay Beijing joogaan la filayaa inay kulamo laba geesood ah la yeeshaan mas’uuliyiin ka socda Dowladda Shiinaha iyo wufuudda dalalka kale ee madasha ka qaybgalaya.
Kulamadaas ayaa diiradda lagu saari doonaa xoojinta xiriirka difaaca, tababarka ciidamada, iskaashiga farsamo iyo taageerada lagu horumarinayo awoodaha Ciidamada Qalabka Sida ee Soomaaliyeed. Waxaa kale oo lagu falanqayn doonaa arrimaha amniga gobolka iyo muhiimadda ay leedahay iskaashi caalami ah oo lagu wajahayo khataraha argagixisada iyo xasillooni-darrada.
Ka qaybgalka Soomaaliya ee Madasha 13-aad ee Beijing Xiangshan ayaa dalka siinaya fursad uu beesha caalamka kula wadaago horumarka laga gaaray dhismaha hay’adaha amniga, isla markaana uu ku ballaariyo iskaashiga istiraatiijiga ah ee dhinacyada difaaca, tababarka iyo nabadgelyada.
Soomaaliya iyo Shiinaha ayaa leh xiriir soo jireen ah, waxaana labada dowladood ka dhexeeya iskaashi dhinacyo badan taabanaya. Wadahadallada ka dhacaya Beijing ayaa la filayaa inay gacan ka geystaan sii xoojinta xiriirkaas, gaar ahaan taageerada dadaallada Soomaaliya ee lagu xaqiijinayo amni, xasillooni iyo dhismaha awood difaac oo qaran.
