Qaahira – Wasiirka Arrimaha Dibadda iyo Iskaashiga Caalamiga ah ee Jamhuuriyadda Federaalka Soomaaliya, Mudane Cabdisalaan Cabdi Cali, ayaa magaalada Qaahira kulan laba geesood ah kula yeeshay Wasiirka Arrimaha Dibadda ee Jamhuuriyadda Carabta Masar, Mudane Badr Abdelatty.
Kulanka ayaa qabsoomay intii uu socday Kalfadhiga 166-aad ee Golaha Wasiirrada Arrimaha Dibadda ee Jaamacadda Carabta, waxaana diiradda lagu saaray xoojinta xiriirka soo jireenka ah iyo iskaashiga dhinacyada kala duwan leh ee ka dhexeeya Soomaaliya iyo Masar.
Labada wasiir ayaa ka wada hadlay sidii loo sii ballaarin lahaa iskaashiga diblomaasiyadeed, siyaasadeed iyo horumarineed ee labada dal. Waxay sidoo kale is-weydaarsadeen aragtiyo ku saabsan xaaladaha iyo isbeddellada ka socda gobolka, iyo muhiimadda ay leedahay in la xoojiyo wada-tashiga joogtada ah.
Soomaaliya iyo Masar waxay mar kale si wadajir ah u adkeeyeen sida ay uga go’an tahay ilaalinta qaranimada, midnimada, madax-bannaanida siyaasadeed iyo wadajirka dhuleed ee labada dal. Waxay sidoo kale xaqiijiyeen inay sii wadi doonaan is-garab-istaagga iyo isku-duwidda mowqifyadooda marka la joogo fagaarayaasha heer gobol iyo heer caalami.
Kulankan ayaa muujinaya xiriirka dhow ee ka dhexeeya Muqdisho iyo Qaahira iyo rabitaanka labada dowladood ee ku aaddan horumarinta iskaashi waara oo ku dhisan walaaltinimo, is-ixtiraam iyo danaha wadajirka ah ee labada dal iyo shacabkooda.
