Ra’iisul Wasaaraha Soomaaliya Xamsa Cabdi Barre ayaa Arbacadii si rasmi ah xilka Taliyaha Ciidanka Xoogga Dalka Soomaaliyeed ugu wareejiyay Taliyaha cusub, Sarreeye Gaas Ibraahim Maxamed Maxamuud, isagoo beddelaya Taliyihii hore, Sarreeye Gaas Odaawaa Yuusuf Raage.
Munaasabadda xil-wareejinta oo ka dhacday magaalada Muqdisho, ayuu Ra’iisul Wasaaruhu ugu hambalyeeyay Taliyaha cusub xilka loo igmaday, isaga oo ku boorriyey in uu hoggaamiyo ciidanka si xirfad leh, edeb iyo hufnaan ku dheehan tahay, si ay u noqdaan tusaale wanaagsan oo ay bulshadu ku dayato, isla markaana ay si buuxda u gutaan waajibaadkooda qaran ee difaaca dalka.
Ra’iisul Wasaare Xamsa ayaa xusay in Ciidanka Xoogga Dalka ay gaareen guulo wax ku ool ah oo laga gaaray dagaalka lagula jiro kooxaha argagixisada, isla markaana ay xoreeyeen deegaanno badan oo horey gacanta ugu jiray kooxahaas, taasoo meesha ka saartay meelihii ay gabaadka ka dhigan jireen.
“Ujeedkeenna waa in si buuxda dalka looga ciribtiro kooxda Al-Shabaab waqti dhow,” ayuu yiri Ra’iisul Wasaaruhu, isagoo intaas ku daray in kooxaha hubeysan ay horey u qabsadeen dhulal ballaaran oo hodan ku ah kheyraadka dabiiciga ah, gaar ahaan dhul beereedyo iyo dooxooyin webiyo mara, si ay u curyaamiyaan wax-soo-saarka dalka.
Ra’iisul Wasaaruhu waxa uu sidoo kale carrabka ku adkeeyay muhiimadda ay leedahay in la ilaaliyo calanka qaranka, oo uu ku tilmaamay astaan sharaf, masuuliyad gaar ahna xambaarsan, isagoo sheegay in horumar dhab ah aan la gaari karin inta aan dalka laga xoreyn cadowga.
Dhanka kale, Ra’iisul Wasaare Xamsa ayaa tilmaamay in dowladda ay mudnaan gaar ah siinayso daryeelka, xuquuqda iyo tayeynta askarta, isla markaana qeyb weyn oo miisaaniyadda qaranka ah lagu bixiyo sugidda amniga iyo badbaadada shacabka.
Ugu dambeyntii, wuxuu uga mahadceliyay Taliyihii hore adeeggiisii daacadda ahaa, isagoo Taliyaha cusub ku dhiirrigeliyay inuu sii wado dadaallada lagu horumarinayo, lagu tayeynayo laguna xoojinayo Ciidanka Xoogga Dalka Soomaaliyeed.
