Muqdisho | September 12, 2026 — Ra’iisul Wasaaraha Xukuumadda Federaalka Soomaaliya, Mudane Xamsa Cabdi Barre, ayaa qiimeyn iyo isla-xisaabtan ku sameeyay waxqabadka wasiirrada Xukuumadda Dan Qaran.
Ra’iisul Wasaaraha ayaa sheegay in qiimeyntu lagu eegayo shaqadii wasaaraduhu qabteen sannadkan, iyadoo lagu saleynayo ballanqaadyadii iyo qorshayaashii uu wasiir kasta saxiixay. Wuxuu xusay in la eegi doono caqabadaha keenay in hawlaha qaar aysan u qabsoomin sidii loo qorsheeyay, si loo saxo hadafyada iyo bartilmaameedyada ku qoran heshiisyadii lala galay wasiirrada.
Markii ugu horreysay, qiimeynta waxaa loo adeegsaday hab dijitaal ah. Natiijooyinka wasaarad kasta, oo lagu muujiyay boqolley, iyo kala horreynta wasaaradaha ayaa lagu soo bandhigay shaashad weyn.
Ra’iisul Wasaare Xamsa ayaa wasiirrada, agaasimayaasha guud iyo hawlwadeennada farsamo ee wasaaradaha ku boorriyay inay dardargeliyaan hawlaha loo igmaday. Wuxuu xusuusiyay in shacabka Soomaaliyeed ay xukuumadda ka sugayaan waxqabad muuqda.
“Qorshe ayaynu samaysanay, idinka ayaa dejiyay, kadibna waan isla saxiixanay,” ayuu yiri Ra’iisul Wasaaruhu. Wuxuu intaas raaciyay in qiimeynta lagu ogaanayo caqabadaha jira, fursadaha la heli karo iyo waxyaabaha u baahan in la saxo.
Ra’iisul Wasaaruhu wuxuu sheegay in habka qiimeynta si joogto ah loo horumarinayo, isla markaana u guurista nidaamka dijitaalka ahi ay fududeyneyso hawsha, waqtiga ay qaadatana yareyneyso.
