Muqdisho, Sabti, 16 Maajo 2026 – Ra’iisul Wasaaraha Xukuumadda Federaalka Soomaaliya, Hamza Abdi Barre, ayaa maanta xafiiskiisa magaalada Muqdisho ku qaabilay Danjiraha Dowladda Yemen u fadhiya Soomaaliya, Faadil Cali Axmed Al‑Xanak, iyadoo kulankaasi diiradda lagu saaray xoojinta xiriirka taariikhiga ah ee ka dhexeeya labada dal ee Soomaaliya iyo Yemen.
Kulanka ayaa lagu falanqeeyay arrimo muhiim ah oo la xiriira iskaashiga diblumaasiyadeed, ganacsiga, amniga, socdaalka, iyo la-dagaallanka tahriibka, iyadoo labada dhinac ay adkeeyeen muhiimadda ay leedahay sii xoojinta wada-shaqeynta labada dowladood.
Ra’iisul Wasaare Xamsa Cabdi Barre ayaa sheegay in Soomaaliya iyo Yemen ay leeyihiin xiriir soo jireen ah oo ku dhisan walaaltinimo, dhaqan, ganacsi iyo xiriir bulsho oo muddo qarniyo ah soo jiray. Waxa uu xusay in labada dal ay wadaagaan dano badan oo istaraatiiji ah, gaar ahaan dhinacyada amniga badda, isu socodka shacabka iyo iskaashiga dhaqaale.
Mudane Xamsa ayaa sidoo kale tilmaamay in dowladda Soomaaliya ay muhiimad gaar ah siinayso xoojinta xiriirka ay la leedahay dalalka gobolka, gaar ahaan Yemen oo door muhiim ah ku leh xiriirka Geeska Afrika iyo gacanka Carabta. Waxa uu sheegay in labada dowladood ay si wadajir ah uga shaqeynayaan sidii loo xoojin lahaa amniga, ganacsiga dekadaha, isku socodka hawada iyo xal u helidda caqabadaha tahriibka iyo socdaalka sharci darrada ah.
Dhinaca kale, Danjiraha Dowladda Yemen, Mudane Faadil Cali Axmed Al-Xanak, ayaa uga mahadceliyay Ra’iisul Wasaaraha Soomaaliya qaabilaadda iyo soo dhoweynta diirran ee loo sameeyay. Danjiraha ayaa bogaadiyay horumarka ay Soomaaliya ka sameysay dhinacyada amniga, dowlad-dhiska iyo dimuqraadiyadda, isaga oo xusay in dowladda Yemen ay si weyn u taageersan tahay dadaallada dib-u-soo kabashada iyo xasilloonida Soomaaliya.
Sidoo kale, danjiraha ayaa sheegay in Yemen ay diyaar u tahay inay sii xoojiso wada-shaqeynta labada dal, gaar ahaan dhinacyada ganacsiga, waxbarashada, maalgashiga iyo arrimaha bani’aadannimada, maadaama labada shacab ay leeyihiin xiriir qoto dheer oo taariikhi ah.
Kulankan ayaa kusoo aadaya xilli dowladda Soomaaliya ay dadaal xooggan ugu jirto xoojinta xiriirka diblumaasiyadeed iyo iskaashiga ay la leedahay dalalka gobolka iyo kuwa caalamka, si kor loogu qaado horumarka dalka, amniga iyo iskaashiga dhaqaale.
by: Ahmed Ali Omar | Qaranimo Online, Muqdisho
