Muqdisho – Ra’iisul Wasaare Ku-xigeenka Labaad ee Xukuumadda Federaalka Soomaaliya, Mudane Jibriil Cabdirashiid Xaaji Cabdi, ayaa magaalada Muqdisho kaga qeyb galay munaasabad lagu daah-furayay adeegga cusub ee “Isku Filan”, oo uu hirgeliyay bangiga MyBank.
Munaasabadda oo lagu qabtay Hotel Decale ee magaalada Muqdisho ayaa waxaa ka qeyb galay mas’uuliyiin dowladda ka tirsan, madaxda MyBank, haween ganacsato ah, aqoonyahanno, ganacsato, dhalinyaro iyo marti-sharaf kale.
Adeegga “Isku Filan” waxaa loogu talagalay taageeridda horumarinta dhaqaalaha haweenka Soomaaliyeed iyo sidii ay u heli lahaayeen adeegyo maaliyadeed oo ka caawiya kobcinta ganacsiyadooda iyo sare u qaadista awooddooda dhaqaale.
Ra’iisul Wasaare Ku-xigeenka Labaad ayaa soo dhaweeyay hindisaha MyBank, isaga oo muujiyay muhiimadda ay leedahay in hay’adaha maaliyadeed ay sameeyaan adeegyo si gaar ah uga jawaabaya baahiyaha haweenka iyo ganacsiyada ay maamulaan.
Waxa uu tilmaamay in haweenka Soomaaliyeed ay door muuqda ka qaataan dhaqaalaha dalka, gaar ahaan ganacsiyada yaryar iyo kuwa dhexdhexaadka ah. Hase yeeshee, waxaa weli jira caqabado dhinaca helitaanka maalgelinta, tababbarrada ganacsi iyo adeegyada maaliyadeed ee joogtada ah.
Adeegga “Isku Filan” ayaa la filayaa inuu qayb ka qaato yareynta caqabadahaas, isla markaana haweenka u abuuro fursado ay ku ballaariyaan ganacsiyadooda, ku horumariyaan xirfadahooda dhaqaale, kuna gaaraan isku-filnaansho waarta.
Madaxda MyBank ayaa munaasabadda ku soo bandhigay aragtida iyo ujeeddooyinka adeegga cusub, iyagoo muujiyay sida ay uga go’an tahay taageeridda haweenka Soomaaliyeed iyo sare u qaadista ka qeybgalka ay ku leeyihiin dhaqdhaqaaqa dhaqaale ee dalka.
Bangiga ayaa sidoo kale muujiyay inuu diyaar u yahay maalgelinta iyo garab-istaagga haweenka leh fikrado ganacsi ama maamula ganacsiyo u baahan inay kobcaan. Hindisahan ayaa muhiim u noqon kara haween badan oo leh karti iyo hal-abuur, balse aan si fudud ku heli karin taageerada maaliyadeed ee ay u baahan yihiin.
Ka qeybgalayaashii munaasabadda ayaa adkeeyay in xoojinta dhaqaalaha haweenku aysan faa’iido u lahayn qofka ama qoyska oo keliya, balse ay si toos ah uga qeyb qaadan karto shaqo-abuurka, dhimista saboolnimada iyo horumarinta dhaqaalaha guud ee dalka.
Marka haweenku helaan fursado maaliyadeed iyo taageero ku filan, waxay awood u yeeshaan inay abuuraan ganacsiyo cusub, kordhiyaan dakhligooda, shaqaaleeyaan dhalinyaro, isla markaana si wanaagsan uga qeyb qaataan horumarinta bulshada.
Adeegga “Isku Filan” wuxuu sidoo kale dhiirrigelinayaa ballaarinta ka mid noqoshada nidaamka maaliyadeed, iyadoo la doonayo in haween badan ay helaan adeegyo bangiyeed oo la jaanqaadaya duruufahooda iyo baahiyahooda ganacsi.
Ra’iisul Wasaare Ku-xigeenka Labaad ayaa hay’adaha maaliyadeed iyo ganacsatada dalka ku dhiirrigeliyay inay kordhiyaan maalgelinta haweenka, dhalinyarada iyo ganacsiyada yaryar, kuwaas oo laf-dhabar u ah dhaqaalaha Soomaaliya.
Daah-furka adeeggan ayaa muujinaya iskaashiga ka dhexeeya dowladda iyo ganacsiga gaarka loo leeyahay ee ku wajahan horumarinta dhaqaalaha, shaqo-abuurka iyo dhismaha bulsho ay haweenku si buuxda uga qeyb qaataan go’aan-qaadashada iyo kobaca dhaqaale.
Adeegga “Isku Filan” ee MyBank ayaa lagu tilmaamay tallaabo dhiirrigelinaysa haweenka Soomaaliyeed, una horseedi karta inay ka gudbaan caqabadaha dhinaca maalgelinta, horumariyaan ganacsiyadooda, kuna gaaraan isku-filnaansho dhaqaale.
