Madaxweynihii hore ee Somalia, Mohamed Abdullahi Farmaajo, ayaa maanta kulan salaan iyo is-xog wareysi ah la yeeshay Madaxweynayaasha dowlad-goboleedyada Puntland iyo Jubbaland, Siciid Cabdullahi Deni iyo Ahmed Mohamed Islam.
Farmaajo ayaa sheegay in kulankaasi si gaar ah diiradda u saaray xaaladda siyaasadeed ee dalka iyo baahida loo qabo wada-tashi dhab ah oo looga gudbo caqabadaha jira.
Wuxuu soo dhaweeyey imaanshaha labada Madaxweyne ee caasimadda Muqdisho, isaga oo ku dhiirrigeliyey dadaallada lagu doonayo in lagu gaaro heshiis loo dhan yahay, si dalka looga badbaadiyo hubanti la’aan iyo qalalaase amni oo ka dhasha khilaafaadka la xiriira doorashada iyo dastuurka.
Madaxweynihii hore ayaa bogaadiyey niyad-samida iyo doonista labada Madaxweyne ee ku aaddan xal waara oo loo dhan yahay.
Dhanka kale, Farmaajo wuxuu ugu baaqay Madaxweynaha xilka haya, Hassan Sheikh Mohamud, inuu la yimaado tanaasul iyo hoggaan suurtagelin kara in laga gudbo ismari-waaga taagan, islamarkaana laga hortago firaaq dastuuri ah.
Ugu dambeyn, Farmaajo ayaa ku baaqay in xaaladda siyaasadeed ee cakiran aysan ka mashquulin gurmadka shacabka Soomaaliyeed ee ay saameysay abaarta daba-dheeraatay, isagoo ku boorriyey in la qaado tallaabooyin cad-cad oo wax ku ool ah si loo badbaadiyo nolosha dadka tabaaleysan.
