Muqdisho | September 14, 2026 – Guddiga Madaxa-Bannaan ee Doorashooyinka Qaranka iyo Soohdimaha (GMDQS) ayaa faahfaahin ka bixiyay hannaanka lagu xulayo ururrada siyaasadeed ee ka qeybgalaya doorashada ku-celiska ah ee Dowlad-goboleedka Galmudug. Afhayeenka Guddiga ayaa gelinkii dambe ee maanta xarunta GMDQS ku qabtay shir jaraa’id, kaas oo uu ku soo bandhigay warsaxaafadeed la xiriira ururrada siyaasadeed ee buuxiyay shuruudaha ka qeybgalka doorashada iyo kuwa aan musharraxiintooda kusoo gudbin muddadii loo asteeyay.
Guddiga ayaa sheegay inuu go’aannadiisa ku saleynayo awoodaha uu siinayo Xeerka Doorashooyinka Qaranka Lr. 28 ee sannadka 2024. Waxa uu xogta la wadaagay ururrada siyaasadda, shacabka Soomaaliyeed iyo dhammaan daneeyeyaasha ku lugta leh geeddi-socodka doorashooyinka dalka.
12 urur siyaasadeed oo gudbiyay liisaska musharraxiinta
Sida uu Guddigu sheegay, muddada loo asteeyay soo gudbinta liisaska musharraxiinta waxay ku ekeyd 12-kii Sebtembar 2026, saacaddu markay ahayd 11:59 habeenimo.
Markii uu dhammaaday waqtigaas, 12 urur siyaasadeed ayaa si rasmi ah usoo gudbiyay liisaska musharraxiintooda iyo dukumentiyada la xiriira shuruudihii looga baahnaa. Ururradaas ayaa loo aqoonsaday kuwo u hoggaansamay jadwalka iyo habraacyada loo dejiyay doorashada ku-celiska ah ee Galmudug.
Guddigu wuxuu sidoo kale xaqiijiyay inay jiraan ururro siyaasadeed oo diiwaangashan, balse aan muddadii loo cayimay kusoo gudbin liisaska musharraxiintooda.
Sidaas darteed, GMDQS wuxuu ururradaas u arkay inaysan diyaar u ahayn ka qeybgalka doorashadan gaarka ah, maadaama aysan buuxin waajibkii la xiriiray soo gudbinta musharraxiinta kahor waqtigii kama dambaysta ahaa.
Guddiga oo fadhi ku ansixiyay go’aanka
Guddiga Madaxa-Bannaan ee Doorashooyinka Qaranka iyo Soohdimaha ayaa 13-kii Sebtembar 2026 yeeshay fadhi uu kaga arrinsaday liisaska la gudbiyay iyo u hoggaansanaanta ururrada siyaasadeed ee jadwalka doorashada.
Fadhigaas ayuu Guddigu ku go’aamiyay in la shaaciyo liisaska musharraxiinta ururrada siyaasadeed ee si dhammaystiran u gudbiyay xogta iyo dukumentiyada laga rabay. Ururrada buuxiyay shuruudaha habraaca ayaa loo oggolaaday inay kusii jiraan tartanka doorashada ku-celiska ah ee Galmudug.
Go’aankan ayaa qeyb ka ah diyaar-garowga lagu xaqiijinayo in ururrada siyaasadeed ee tartamaya ay si isku mid ah ugu hoggaansamaan shuruucda, jadwalka iyo habraacyada uu soo saaray Guddigu.
Go’aanku ma baabi’inayo sharciyadda ururrada
GMDQS ayaa si gaar ah u caddeeyay in go’aankani uu khuseeyo oo keliya hannaanka soo gudbinta liisaska musharraxiinta ee doorashada ku-celiska ah ee Galmudug.
Guddigu wuxuu xusay inuusan go’aankani ahayn mid siyaasadeed, sidoo kalena uusan baabi’inayn jiritaanka sharci ee urur siyaasadeed diiwaangashan. Ururrada aan waqtigii loo asteeyay gudbin musharraxiintooda waxay weli sii haysanayaan diiwaangelintooda sharci, balse kama qeybgalayaan doorashadan gaarka ah.
Caddeyntan ayaa looga gol leeyahay in la kala saaro xaaladda sharci ee urur siyaasadeed iyo xaqa uu ugu leeyahay inuu ka qeybqaato doorasho cayiman, taas oo ku xiran inuu waqtigeeda ku buuxiyo shuruudaha iyo habraacyada loo dejiyay.
Muhiimadda jadwalka doorashada
Guddiga ayaa tilmaamay in doorasho kasta ay leedahay jadwal, habraac iyo waqtiyo kama dambeys ah oo u gaar ah hawlaha kala duwan. Shuruudahaas ayaa si siman ugu waajibaya dhammaan ururrada siyaasadeed ee doonaya inay ka qeybqaataan doorashada.
U hoggaansanaanta jadwalka ayaa muhiim u ah diyaarinta iyo hirgelinta doorashada, xaqiijinta sinnaanta tartamayaasha iyo ka hortagga dib-u-dhac ku yimaada geeddi-socodka.
Guddigu wuxuu sheegay in waqtiyada kama dambaysta ah aan loogu talagelin in urur gaar ah lagu hor istaago ka qeybgalka doorashada, balse ay yihiin qeyb muhiim ah oo lagu xaqiijinayo in dhammaan dhinacyadu ku shaqeeyaan hal nidaam oo cad.
GMDQS oo ballanqaaday doorasho caddaalad iyo hufnaan leh
Guddiga Madaxa-Bannaan ee Doorashooyinka Qaranka iyo Soohdimaha ayaa qiray kaalinta muhiimka ah ee ururrada siyaasadeed ku leeyihiin geeddi-socodka dimuqraadiyadeed iyo horumarinta nidaamka doorashooyinka Soomaaliya.
GMDQS wuxuu sheegay inay ka go’an tahay xaqiijinta hannaan doorasho oo caddaalad ah, hufan, loo dhan yahay, isla markaana dhammaan ururrada iyo musharraxiintu ugu tartamaan si siman.
Guddigu wuxuu adkeeyay in si isku mid ah loo dhaqan-gelin doono jadwalka iyo shuruucda doorashada, iyadoo aan urur gaar ah loo sameyn doonin mudnaan ama ka-reebitaan.
Shaacinta liisaska musharraxiinta ururrada buuxiyay shuruudaha ayaa qeyb ka ah tallaabooyinka loogu diyaar-garoobayo qabsoomidda doorashada ku-celiska ah ee Galmudug, iyadoo la sugayo in Guddigu faahfaahin dheeraad ah ka bixiyo marxaladaha xiga ee jadwalka doorashada.
