Dowladaha Turkiga iyo Sacuudi Carabiya ayaa si wadajir ah u soo saaray bayaan rasmi ah kaddib safar shaqo oo Madaxweyne Recep Tayyip Erdoğan ku tegay magaalada Riyaad, kaas oo diiradda lagu saaray xoojinta xiriirka laba geesoodka ah, gaar ahaan dhinacyada difaaca iyo amniga.
Bayaanka ayaa tilmaamay in labada dal ay ku heshiiyeen hirgelinta iyo dardargelinta heshiisyadii iskaashi ee horey u kala saxiixdeen, isla markaana la ballaarinayo wada shaqeynta milatari, tababarrada, iyo is-weydaarsiga khibradaha amniga.
Sidoo kale, Turkiga iyo Sacuudiga ayaa muujiyay inay wadaagaan mowqif mideysan oo ku aaddan khilaafaadka ka taagan Bariga Dhexe iyo qaaradda Afrika, iyagoo adkeeyay muhiimadda ay leedahay in xalal siyaasadeed oo waara laga gaaro.
Waxaa kale oo bayaanka lagu xusay ballanqaad adag oo ku saabsan wada shaqeynta la dagaallanka argaggixisada, joojinta maalgelinta kooxaha xagjirka ah, iyo ka hortagga khataraha amniga dhijitaalka ah, taasoo muujinaysa heerka sare ee kalsoonida iyo iskaashiga sii kordhaya ee u dhexeeya labada dal.
Labada dowladood ee Turkiga iyo Sacuudi Carabiya ayaa si adag u cambaareeyay tallaabooyinka ay Israa’iil ku hor istaagayso gaarsiinta gargaarka bani’aadannimo ee dadka ku dhibaateysan Marinka Qasa, iyagoo ku baaqay in si degdeg ah loo furo dhammaan marinada iyo isgoysyada u suurtagelinaya in gargaar buuxa la gaarsiiyo shacabka halkaas ku nool.
Waxay sidoo kale soo dhaweeyeen dadaallada nabadeed ee uu hormuudka ka yahay Madaxweynaha Maraykanka Donald Trump, gaar ahaan wejiga labaad ee qorshaha lagu doonayo in xal waara loogu helo xaaladda Qasa, iyagoo muujiyay taageero buuxda oo ku aaddan wadahadallada nabadda.
Dhanka kale, Turkiga iyo Sacuudiga ayaa si mideysan u diiday sheegashada Israa’iil ee ah inay aqoonsatay maamulka Somaliland, iyagoo mar kale adkeeyay mowqifkooda ku aaddan ilaalinta midnimada, madax-bannaanida iyo wadajirka dhuleed ee Jamhuuriyadda Federaalka Soomaaliya.
Bayaanka wadajirka ah ayaa lagu sheegay in tallaabada Israa’iil ay tahay mid ka hor imaaneysa sharciga caalamiga ah, isla markaana halis gelin karta xasilloonida gobolka iyo xiriirka dalalka deriska ah.
Sidoo kale, labada dal waxay caddeeyeen taageeradooda Dowladda Yemen ee caalamku aqoonsan yahay, oo uu hoggaamiyo Golaha Hoggaaminta, iyagoo ka digay tallaabo kasta oo lagu wiiqayo midnimada Yemen ama lagu hurinayo khilaafaad gudaha ah.
Arrintan ku saabsan sheegashada aqoonsiga Somaliland ayaa hadda u muuqata mid sii luminaysa miisaankeedii siyaasadeed, kaddib markii Israa’iil ay la kulantay cambaarayn iyo diidmo caalami ah oo ballaaran.
