Muqdisho | September 14, 2026 – Guddiga Dhaqaalaha, Maaliyadda, Ganacsiga, Warshadaha, Isgaarsiinta iyo Dalxiiska ee Golaha Aqalka Sare ee Baarlamaanka Jamhuuriyadda Federaalka Soomaaliya ayaa maanta kulan muhiim ah la yeeshay mas’uuliyiin ka socday Wasaaradda Maaliyadda Xukuumadda Federaalka Soomaaliya.
Wafdiga Wasaaradda Maaliyadda waxaa hoggaaminayay Wasiir-ku-xigeenka Wasaaradda, Mudane Cabdulqafaar Cilmi Xaange, waxaana kulanka ku wehlinayay xubno kale oo ka tirsan Wasaaradda.
Kulanka, oo ka qabsoomay xafiiska Guddiga, waxaa shir-guddoominayay Guddoomiyaha Guddiga, Senator Cabdi Axmed Dhuxulow (Dhagdheer). Waxa uu qayb ka ahaa gudashada waajibaadka dastuuriga ah ee Guddiga, gaar ahaan dib-u-eegista iyo turxaan-bixinta hindise-sharciyeedyada horyaalla Golaha Aqalka Sare.
Ujeeddada ugu weyn ee kulanka ayaa ahayd in mas’uuliyiinta Wasaaradda Maaliyadda laga helo faahfaahin iyo fasiraad dheeraad ah oo ku saabsan Hindise-Sharciyeedka Dhisidda Hay’adda Dakhliga. Doodda ayaa si gaar ah diiradda loogu saaray qodobbada qeexaya qaab-dhismeedka hay’adda, awoodaha iyo shaqooyinka loo igmanayo, iyo habka ay u gudan doonto waajibaadkeeda.
Intii uu kulanku socday, xubnaha Guddiga ayaa mas’uuliyiinta Wasaaradda weydiiyay su’aalo kala duwan oo la xiriiray qodobbada hindise-sharciyeedka ee u baahan caddayn iyo faahfaahin dheeraad ah. Waxay sidoo kale soo bandhigeen aragtiyo iyo talooyin lagu xoojinayo nuxurka sharciga, si meesha looga saaro qodobbada mugdiga ku jira loona xaqiijiyo in waajibaadka iyo awoodaha hay’adda cusub si cad loo qeexo.
Guddiga ayaa muhiimad gaar ah siinaya in hindise-sharciyeedka lagu sameeyo sixitaan iyo turxaan-bixin dhammeystiran ka hor inta aan loo gudbin marxaladaha xiga ee habraaca sharci-dejinta. Arrintan ayaa looga gol leeyahay in sharcigu noqdo mid waafaqsan dastuurka, isla markaana ka jawaaba baahiyaha dalka ee la xiriira maamulka iyo ururinta dakhliga.
Kulanka ayaa qayb ka ah dadaallada Golaha Aqalka Sare uu ku hubinayo in hindise-sharciyeedyada la horgeeyo Baarlamaanka lagu saleeyo xog, wadatashi iyo faham dhammaystiran, si loo helo sharciyo tayo leh oo taageeraya hufnaanta hay’adaha dowladda iyo horumarinta nidaamka maaliyadeed ee dalka.
