MASAR WAXAY CADDEYSAY: HORUMARKA BEERUHU KUMA XIRNA BAAXADDA DHULKA, WUXUU KU XIRAN YAHAY HOGGAANKA IYO QORSHAHA
Waxaa qortay oodiyaarisay: Hay’adda Agro-Coastal Research and Development Organization (ACORDO) Fadhigeeduna uu yahay Dalka Canada & Dalka Soomaaliya.
Majaladda Caalamiga ah ee Qaranimo – Falanqayn Gaar ah
HORDHAC: SU’AASHA AY TAHAY IN SOOMAALIYA IS WEYDIIISO
Waxaa jirta aragti muddo dheer bulshada dhexdeeda ku baahsanayd oo oranaysa: dalka beerihiisu way horumari karaan haddii uu leeyahay dhul badan oo bacrin ah iyo roobab badan.
Laakiin waayo-aragnimada Masar waxay si xooggan u burburinaysaa dooddaas.
Masar waa dal ay qaybta ugu badan ee dhulkiisu tahay lama-degaan, halka nolosha iyo wax-soo-saarka beeraha ay si weyn ugu urursan yihiin hareeraha iyo dooxooyinka Wabiga Niil iyo dhulalka la waraabiyo. Haddana Masar waxay beeraha ka dhigtay qayb muhiim ah oo ka mid ah istaraatiijiyaddeeda dhaqaale iyo sugnaanta cuntada.
Dowladda Masar waxay si rasmi ah u sheegtay in beeruhu yihiin tiir muhiim ah oo dhaqaalaha qaranka ah, iyadoo siyaasaddeeda ay ku jirto kordhinta wax-soo-saarka, horumarinta waraabka, cilmi-baarista, tiknoolajiyada, abuurka, dib-u-habaynta dhulka iyo ballaarinta beeraha.
Sidaas darteed, su’aasha muhiimka ahi ma aha:
“Yaa haysta dhulka ugu badan?”
Waxay tahay:
“Yaa si wanaagsan u maamula dhulkiisa, biyihiisa, aqoontiisa, beeraleydiisa iyo maal-gashigiisa?”
Halkaas ayay sheekada Masar iyo Soomaaliya ku kala duwan yihiin.
1. MASAR: DALKA SAXARAHA AH EE KA DHIGAY BIYAHA QORSHE QARAN
Masar waxay fahamtay xaqiiqo muhiim ah: biyo yar haddii si wanaagsan loo maareeyo waxay ka qiimo badnaan karaan biyo badan oo aan nidaam lahayn.
Wabiga Niil wuxuu Masar u yahay laf-dhabarta nolosha, laakiin muhiimaddu kuma koobna jiritaanka webiga, Waxa muhiimka ah waa nidaamka ku dhisan webiga sida: Waraab, Biyo-xireenno, Kanaallo, Cilmi-baaris, Qorshe dalag, Abuur tayo leh, Farsamaynta wax-soo-saarka, Suuq gudaha iyo dibadda, Tababarka Beeraleyda iyo Siyaasado Dowladeed oo joogto ah.
Masar waxay sidoo kale qaadatay laba waddo oo isku mar ah:
Horizontal expansion – in dhul cusub oo beeraha ah la abuuro.
Vertical expansion – in dhulkii hore loo kordhiyo wax-soo-saarkiisa halkii kaliya dhul cusub la raadin lahaa.
Istaraatiijiyadda Masar 2030 waxay si cad u xustaa kordhinta wax-soo-saarka, ballaarinta dhulka beeraha, cilmi-baarista, tiknoolajiyada, noocyada dalagyada wax-soo-saarka badan iyo tababarka beeraleyda.
Tani waa meesha casharka ugu weyn uu ku jiro:
«Masar ma aysan sugin in dabeecaddu u diyaargarowdo beeraha; waxay dhistay nidaam ay beeruhu uga shaqeeyaan xaaladda dabiiciga ah ee ay haysato.»
2. MASAR WAXAY BEERAHA U ARAGTAA ARRIN AMNI QARAN
Dal kasta oo dunida maanta ka jira waxaa horyaalla su’aal ah:
Haddii silsiladaha cuntada caalamka ay go’aan, shacabkaaga yaa quudinaya?
COVID-19, dagaalka Ukraine, khalkhalka ganacsiga caalamiga ah, isbeddelka cimilada iyo kororka qiimaha badeecadaha waxay dunida bareen in cuntadu aysan ahayn oo keliya badeeco suuqa taalla.
Cuntadu waa awood siyaasadeed.
Masar sidaas ayay u fahamtay.
Dowladda Masar waxay sugnaanta cuntada ku xirtay yareynta farqiga u dhexeeya wax-soo-saarka gudaha iyo baahida dalka, kordhinta tartanka wax-soo-saarka beeraha iyo kobcinta dhoofinta beeraha.
Sidaas darteed, beeruhu waxay isku mar uga shaqeeyaan:
Cunto → Shaqo → Dakhli → Dhoofin → Lacag qalaad → Xasillooni bulsho → Amni qaran.
Tani waa aragti ay Soomaaliya u baahan tahay inay si dhab ah u qaadato.
3. SOOMAALIYA: DALKA HAYSTA WAXYAABAHA AY MASAR RAADINAYSO
Haddii Masar ay leedahay caqabad weyn oo ah dhul lama-degaan ah iyo biyo kooban, Soomaaliya waxay leedahay xaalad ka duwan.
Soomaaliya waxay leedahay dhul ballaaran oo ku habboon wax-soo-saarka beeraha, biyaha dhulka hoostiisa, iyo nidaamyo webiyeed muhiim ah oo ay ka mid yihiin Shabeelle iyo Jubba.
FAO waxay Soomaaliya ku tilmaantay dal leh qiyaastii 8.9 milyan hektar oo dhul beerashada ku habboon, iyadoo webiyada Shabeelle, Jubba iyo Dawa ay leeyihiin dherer isku-dar ah oo ku dhow 2,500 km. Hay’addu waxay sidoo kale tilmaantay in beeraha iyo xooluhu ay yihiin laf-dhabarta dhaqaalaha iyo nolosha dadka Soomaaliyeed.
Haddaba waxaa soo baxaya su’aal aad u culus:
Haddii Masar ay saxaraha dhexdiisa ka dhisatay wax-soo-saar beeraha ah, maxaa Soomaaliya uga hor istaagay inay ka faa’iidaysato dhulkeeda iyo webiyadeeda?
Jawaabtu ma aha:
“Soomaaliya dhul ma leh.”
Sidoo kale ma aha:
“Soomaaliya biyo ma leh.”
Dhibaatadu waxay inta badan ku jirtaa nidaamka loo maareeyo kheyraadka.
4. Dhibaatada Soomaaliya: KHEYRAAD JIRA, LAKIIN NIDAAM DABOOLAYA MA JIRO
Soomaaliya muddo dheer waxay la kulmaysay caqabado is biirsaday:
1. Waraab aan ku filnayn
Beeraha Soomaaliya badankoodu waxay si weyn ugu tiirsan yihiin roobabka.
Marka roobku yaraado, wax-soo-saarku wuu dhacaa.
Marka roobku bato, daadad ayaa burburiya beerihii.
Taasi waxay abuureysaa xaalad is-khilaafsan:
Biyo la’aan xilliga qalalan + biyo badan xilliga roobka.
Labada xaaladoodba waxay u baahan yihiin hal jawaab:
MAAREYN BIYO OO QARAN.
5. WEBIYADA JUBBA IYO SHABEELLE: KHEYRAAD AAN WELI SI BUUXDA LOOGU BADDALIN HANTI QARAN
Shabeelle iyo Jubba ma aha oo keliya webiyo.
Waxay noqon karaan:
– nidaamyo waraab;
– xarumo wax-soo-saar;
– ilo koronto;
– suuqyo beeraha ku xiran;
– warshado;
– shaqo-abuur;
– dhoofin;
– iyo saldhigga sugnaanta cuntada Soomaaliya.
Laakiin webi aan lahayn qorshe biyo-qabad, biyo-xireenno, kanaallo, nidaam qaybinta biyaha, dayactir iyo hay’ad maamusha ma noqon karo matoor dhaqaale oo buuxa.
FAO waxay sheegtay in caqabado ay ka mid yihiin kaabayaal waraab oo liita iyo nidaamyo aan si wanaagsan u maareyn biyaha ay hoos u dhigaan wax-soo-saarka beeraleyda Soomaaliya.
6. SABUUN BARRAGE: TALLAABO MUHIIM AH OO SOOMAALIYA U QAADAYSO MUSTAQBALKA
Waxaa muhiim ah in la aqoonsado in Soomaaliya maanta ay waddooyin cusub ku bilowday.
Bishii Sebtembar 2026 waxaa la bilaabay hawsha dib-u-soo-celinta Sabuun Barrage ee Hirshabelle, taas oo qayb ka ah Jowhar Offstream Storage Programme – JOSP.
Mashruucan waxaa loogu talagalay in lagu xoojiyo sugnaanta biyaha, waraabka, xakamaynta fatahaadaha iyo adkeysiga bulshada ee isbeddelka cimilada.
JOSP waa tusaale muujinaya in haddii la helo qorshe isku xira:
Biyo + Waraab + Beeraha + Kaabayaal + Maamul + Maalgelin,
Soomaaliya ay bilaabi karto inay si dhab ah uga faa’iidaysato Shabeelle.
Barnaamijka waxaa lagu qiyaasay inuu horumarin karo helitaanka waraabka in ka badan 300,000 qof, isla markaana yareyn karo khataraha fatahaadaha iyo abaaraha ee malaayiin qof.
Tani waa bilow muhiim ah.
Laakiin Soomaaliya waxay u baahan tahay in mashruucyada noocan ah laga gudbo heerka mashruuc keliya oo loo beddelo siyaasad qaran oo joogto ah.
7. KAABAYAAL KELIYA MAKU FILNA
Waxaa jirta cashar kale oo muhiim ah.
Waxaa laga yaabaa in dowladdu dhisto biyo-xireen, kanaal ama xarun waraab.
Laakiin haddii aan la helin:
– hay’ado awood leh;
– nidaam dayactir;
– xeerar biyo-qaybin;
– diiwaangelin dhul;
– xalinta khilaafaadka;
– tababar;
– xog beereed;
– maalgelin;
– iyo suuq,
kaabayaashaasi waxay muddo kadib noqon karaan kuwo shaqadooda waaya.
FAO waxay 2026 si cad u xustay in kaabayaasha keliya aysan dammaanad qaadi karin horumar waara; waxaa lama huraan ah maamul hufan, hay’ado awood leh, isku-duwid, qaybin caddaalad ah oo biyaha ah iyo nidaamyo joogto ah oo hawlgal iyo dayactir ah.
Sidaas darteed:
«Soomaaliya uma baahna oo keliya biyo-xireenno; waxay u baahan tahay nidaam qaran oo biyo-xireennada maamula.»
8. ABUURKA: HALKA AY KA BILAABATO KACAANKA BEERAHA
Dalagga wanaagsan wuxuu u baahan yahay abuur wanaagsan.
Beeraley Soomaaliyeed oo isticmaala abuur tayo hooseeya, bacrimin aan habboonayn iyo farsamooyin dhaqameed wuxuu heli karaa wax-soo-saar aad uga hooseeya awoodda dhulkiisa.
FAO waxay tilmaantay in wax-soo-saarka dalagyada Soomaaliya uu wajahayo caqabado ay ka mid yihiin abuur tayo liita, waraab xaddidan, farsamooyin dhaqameed, makiinadeyn yar iyo kaabayaal farsamayneed oo kooban.
Sidaa darteed Soomaaliya waa inay dhistaa:
“National Seed System”
oo leh:
– xarumo cilmi-baaris;
– bangiyada abuurka;
– shaybaarro;
– abuur la tijaabiyey;
– noocyo u adkeysan kara abaaraha;
– noocyo wax-soo-saar badan;
– iyo nidaam lagu hubiyo tayada abuurka.
Masar waxay maanta xitaa xoogga saareysaa wax-soo-saarka abuurka gudaha, oo ay ku jiraan barnaamijyo lagu kordhinayo wax-soo-saarka abuurka dalagyada muhiimka ah.
9. CILMI-BAARISTA: BEERAHA CASRIGA AH MA AHA “BEER OO SUG”
Beeraha casriga ahi ma shaqeeyaan qaabkii hore ee ahaa:
“Beer dhulka, roob sug, dabadeed dalag gooso.”
Beeraha casriga ahi waxay ku shaqeeyaan:
Xog → saadaal → abuur → biyo → bacrimin → tiknoolaji → goosasho → kaydin → warshadeyn → suuq.
Taasi waa silsilad dhaqaale oo dhammeystiran.
Masar waxay siyaasaddeeda beeraha ku dartay cilmi-baaris lagu horumarinayo noocyada dalagyada, beeraha casriga ah, tiknoolajiyada dijitaalka ah, nidaamyada digniinta hore iyo hababka waraabka casriga ah.
Soomaaliyana waxay u baahan tahay jaamacadaha, xarumaha cilmi-baarista, Wasaaradda Beeraha iyo ganacsatada gaarka loo leeyahay inay sameeyaan Somali Agricultural Research Network.
10. SOOMAALIYA WAA INAY KA GUDBAA “BEERAHA” OO AY GASHAA “AGRIBUSINESS”
Waxaa jira qalad kale oo muhiim ah.
Haddii Soomaaliya tiraahdo:
“Waxaan rabnaa inaan beeraleyda caawino,”
taasi waa tallaabo wanaagsan.
Laakiin haddii ay tiraahdo:
“Waxaan rabnaa inaan dhisno silsilad dhaqaale oo beeraha ku dhisan,”
taasi waa isbeddel dhab ah.
Beeraleygu waa inuu heli karaa:
Abuur → Bacrimin → Mashiin → Waraab → Wax-soo-saar → Kaydin → Gaadiid → Warshad → Suuq → Dhoofin.
Haddii mid ka mid ah silsiladdan uu maqnaado, beeraleydu waxay lumin kartaa qiimaha ugu badan ee wax-soo-saarkeeda.
11. MAXAA LOOGA FAA’IIDAYN KARAA DALAGYADA SOOMAALIYA?
Soomaaliya ma aha inay ku koobnaato wax-soo-saarka quudinta gudaha oo keliya.
Waxaa jira dalagyo leh fursado ganacsi oo gudaha iyo dibadda ah, sida:
– sisin;
– galley;
– masaggo;
– bariis;
– digir;
– basasha;
– yaanyo;
– baradho;
– khudaar;
– miro;
– iyo dalagyo kale oo ku habboon deegaanka.
FAO waxay si gaar ah u tilmaantay sisinta inay tahay dalag qiimo sare leh oo Soomaaliya leedahay awood weyn oo wax-soo-saar iyo dhoofin ah, balse wax-soo-saarka iyo qiime-kordhinta ay xaddidayaan abuur tayo liita, waraab yar, makiinadeyn kooban iyo warshadeyn aan ku filnayn.
Taasi waxay ina tusaysaa fursad kale:
Soomaaliya waa in aysan dhoofin dalag ceeriin oo keliya.
Waa inay dhoofisaa:
Wax-soo-saar la farsameeyey.
Tusaale ahaan:
Sisin → Saliid sisin → Baakad → Sumad Soomaali ah → Suuq caalami ah.
Yaanyo → Tomato paste → Warshad → Baakad → Dhoofin.
Miro → Juice → Processing → Export.
Tani waxay kordhinaysaa qiimaha wax-soo-saarka, shaqo-abuurka iyo dakhliga dalka.
12. DAAWADA DHABTA AH: “NATIONAL AGRICULTURAL TRANSFORMATION PLAN”
Soomaaliya waxay u baahan tahay qorshe qaran oo aan ku koobnaan hal dowlad ama hal wasiir.
Waxaan soo jeedinayaa:
QORSHAHA 10-SANO EE ISBEDDELKA BEERAHA SOOMAALIYA
Marxaladda 1aad: 1–2 sano
– Diiwaangelinta dhulka beeraha;
– khariidaynta biyaha;
– xog-ururin ku saabsan dalagyada;
– dayactirka kanaallada jira;
– abuur tayo leh;
– tababar beeraley;
– dhisidda suuqyada dalagyada;
– iyo xoojinta hay’adaha beeraha.
Marxaladda 2aad: 3–5 sano
– ballaarinta waraabka;
– biyo-xireenno iyo kayd-biyood;
– makiinadeynta beeraha;
– xarumo kaydinta dalagyada;
– qaboojiyeyaal;
– warshado farsameeya wax-soo-saarka;
– bangi ama sanduuq maalgelin beeraha;
– caymiska beeraha.
Marxaladda 3aad: 5–10 sano
– dhoofinta wax-soo-saarka;
– beeraha casriga ah;
– digital agriculture;
– isticmaalka satellite-ka iyo xogta cimilada;
– agro-processing zones;
– xarumo cilmi-baaris oo heer gobol iyo caalami ah;
– iyo in Soomaaliya noqoto xarun wax-soo-saar iyo dhoofin beereed oo Geeska Afrika ah.
13. DOORKA QURBA-JOOGTA IYO MAALGASHADA GAARKA LOO LEYAHAY
Dowladdu kaligeed ma maalgelin karto isbeddelkan.
Soomaaliya waxay leedahay malaayiin qof oo qurba-joog ah oo ku nool:
– Yurub;
– Waqooyiga Ameerika;
– Khaliijka;
– Bariga Afrika;
– iyo meelo kale.
Qurba-joogtu waxay noqon kartaa maalgeliyaha ugu weyn ee beeraha haddii loo sameeyo:
– sharciyo cad;
– dammaanad maalgashi;
– dhul sharciyeysan;
– canshuur dhiirrigelin leh;
– ilaalinta heshiisyada;
– iyo nidaam maaliyadeed oo hufan.
Waxaa la dhisi karaa:
“Somalia Agricultural Investment Fund”
oo ay ka qayb qaataan:
Dowladda + Bangiyada + Qurba-joogta + Ganacsatada + Hay’adaha horumarinta + Maalgashadayaasha caalamiga ah.
14. BEERAHA IYO SHAQO ABUURKA DHALLINYARADA
Dhallinyarada Soomaaliyeed looma baahna oo keliya in loo sheego:
“Beeraha ku laabta.”
Waxaa loo baahan yahay in beeraha laga dhigo shaqo casri ah oo sharaf iyo faa’iido leh.
Dhallinyaradu waxay noqon karaan:
– agronomists;
– drone operators;
– irrigation technicians;
– agricultural engineers;
– data analysts;
– machine operators;
– agribusiness entrepreneurs;
– exporters;
– food processors;
– iyo cilmi-baarayaal.
Taasi waxay beeraha ka beddeli kartaa shaqo dhaqameed oo keliya una beddeli kartaa warshad aqoon iyo tiknoolaji ku dhisan.
15. CUNTADA SOOMAALIYA: MAXAY TAHAY SABABTA AAN U SOO DEGSANAYNO?
Su’aashan waa in si qaran loo weydiiyo.
Haddii dhulkeennu wax soo saari karo, haddii webiyadeennu jiraan, haddii dadkeennu leeyihiin aqoon dhaqameed beeraha ah, haddana aynu qayb weyn oo cuntadeenna ka soo iibsanno dibadda, waa in la baaro sababta.
Dhibaatadu ma aha oo keliya beeraleyda.
Waxay ku jirtaa nidaamka oo dhan:
Siyaasadda + Waraabka + Abuurka + Maalgelinta + Kaydinta + Gaadiidka + Suuqa + Warshadaynta + Amniga + Sharciga.
Sidaas darteed, Soomaaliya waxay u baahan tahay in beeraha laga eego aragti qaran, ee aan laga eegin mashruucyo yaryar oo kala go’an.
16. CUSBOONAYSIIN MUHIIM AH: SOOMAALIYA HORAY AYAY U BILAABATAY
Inkasta oo caqabadaha waaweyn jiraan, sawirka Soomaaliya ma aha mid gebi ahaanba mugdi ah.
Waxaa jira mashaariic muhiim ah oo socda.
Waxaa ka mid ah Jowhar Offstream Storage Programme, dib-u-dayactirka kanaallada Shabeelle iyo dadaallada lagu xoojinayo maamulka biyaha.
FAO waxay sheegtay in mashruucyo ka socda Lower Shabelle ay dib u dayactirayaan in ka badan 140 km oo kanaallo waraab ah, taas oo muujinaysa in maalgelinta kaabayaasha biyaha ay si toos ah u saameyn karto wax-soo-saarka beeraleyda.
Sidoo kale, shaqada Sabuun Barrage waxay noqon kartaa albaab cusub oo Soomaaliya ka gasho marxalad ka duwan tii hore, haddii si hufan, joogto ah oo qorshaysan loo maareeyo.
Marka: Rajadu way jirtaa.
Waxa loo baahan yahay waa in rajadaas loo beddelo siyaasad qaran oo muddo dheer socota.
17. CASHARKA MASAR: KHEYRAADKA MAAMULKIISA AYAA KA MUHIIMSAN XAJMIGIISA
Waxaa laga yaabaa in tani tahay casharka ugu weyn ee Masar Soomaaliya siin karto.
Masar ma haysato dhul beeraha u fudud sida Soomaaliya.
Laakiin waxay leedahay: Qorshe.
Waxay leedahay: Hay’ado.
Waxay leedahay: Cilmi-baaris.
Waxay leedahay: Kaabayaal.
Waxay leedahay: Maalgelin.
Waxay leedahay: Suuq
Waxayna leedahay: aragti ah in cuntadu tahay amni qaran.
Soomaaliyana waxay haysataa: Dhul, Webiyo, Biyo, Cimilooyin kala duwan, Shaqaale badan, Suuq gudaha ah, Xiriir ganacsi oo caalami ah.
Haddaba farqiga ugu weyn wuxuu noqon karaa: “Sidee loo maamulayaa waxa la haysto?”
18. SOOMAALIYA HADDII AY RABTO INAY NOQOTO QUWAD BEEREED
Waxaan soo jeedinayaa toddobo tiir oo ay tahay inay noqdaan ajandaha qaranka:
TIIRKA 1AAD — BIYAHA
Maareynta Jubba iyo Shabeelle, biyo-xireenno, kayd-biyood iyo waraab casri ah.
TIIRKA 2AAD — DHULKA
Diiwaangelinta, ilaalinta iyo qorsheynta dhulka beeraha.
TIIRKA 3AAD — ABUURKA
Abuur tayo leh oo gudaha lagu soo saaro lana baaro.
TIIRKA 4AAD — AQOONTA
Jaamacado, cilmi-baaris, tababar iyo adeegyo fidin beeraha ah.
TIIRKA 5AAD — MAALGASHIGA
Sanduuqyo maalgelin, bangiyada beeraha, caymis iyo maalgashi gaar loo leeyahay.
TIIRKA 6AAD — WARSHADAYNTA
Dalagga ceeriin ha laga dhigo badeeco qiimo badan leh.
TIIRKA 7AAD — SUUQA
Soomaaliya waa inay ka fikirtaa gudaha oo keliya ma aha; waa inay beegsataa suuqyada Bariga Afrika, Khaliijka, Carabta iyo caalamka.
GUNAANAD: SU’AASHU MA AHA DHULKA AAN HAYSANNO—WAA QORSHAHA AAN HAYSANNO
Masar waxay dunida u muujisay in beeruhu aysan ku xirnayn oo keliya baaxadda dhulka ama roobka.
Waxay ku xirnaan karaan:
aragti qaran, maamul, aqoon, tiknoolaji, biyo-maamul, maalgelin iyo dulqaad siyaasadeed.
Soomaaliya, marka la eego awooddeeda dhuleed, webiyadeeda, biyahaheeda iyo xooggeeda shaqaale, waxay leedahay fursad aad u weyn.
Laakiin fursaddu kaligeed ma dhaliso horumar.
Fursaddu waxay u baahan tahay qorshe.
Qorshuhu wuxuu u baahan yahay hay’ado.
Hay’aduhuna waxay u baahan yihiin hoggaan.
Hoggaankuna wuxuu u baahan yahay aragti ka weyn muddada hal doorasho ama hal xukuumad.
Soomaaliya waa inay go’aansataa inay beeraha u aragto mashruuc gargaar ah ama matoor dhaqaale oo qaran.
Haddii aan dooranno tan labaad, Jubba iyo Shabeelle waxay noqon karaan halbowlayaasha dhaqaale ee dalka; dhulalka beerahana waxay noqon karaan warshadaha ugu waaweyn ee shaqo iyo dakhli abuurka.
Waxaan u baahanahay inaan ka gudubno su’aasha:
“Maxaan maanta cuneynaa?”
oo aan gaarno su’aasha:
“Maxaan berri Soomaaliya ka soo saari karnaa, maxaanse dunida ka iibin karnaa?”
Taariikhdu waxay xusi doontaa in Masar ay ka adkaatay caqabadda saxaraha, iyadoo biyihii Niil ka dhigtay tiir ay ku dhisto beeraha iyo sugnaanta cuntada.
Soomaaliya se waxay haysataa fursad ka duwan:
Waxay leedahay dhul, webiyo iyo awood beereed aan weli si buuxda loo adeegsan.
Sidaas darteed su’aasha taariikhiga ah ee maanta ina hortaalla waa:
GOORMA AYAY SOOMAALIYA KA ADKAAN DOONTAA QORSHE LA’AANTA?
Haddii aan maanta bilowno, mustaqbalka Soomaaliya ma noqon doono dal keliya oo cuntada soo dhoofsada.
Waxay noqon kartaa:
DAL SOO SAARA CUNTADA, SOO SAARA SHAQADA, SOO SAARA HANTIDA, KUNA DHISA MADAX-BANNAANIDIISA DHAQAALAHA DHULKIISA IYO BIYAHEEDA.
W/Q: ACORDO
Majaladda Caalamiga ah ee Qaranimo
TORONTO – CANADA🍁
