Guddoomiyaha Xiriirka Kubadda Cagta Soomaaliya, Mudane Cali Cabdi Maxamed, oo loo yaqaan (Cali Shiine), ayaa si rasmi ah loogu doortay xilka Madaxweyne Ku-xigeenka Ururka Kubadda Cagta Bariga iyo Bartamaha Afrika (CECAFA), kaddib markii ay si guul leh u qabsoontay Shirweynaha Guud ee Doorashada CECAFA, kaas oo lagu qabtay Jamhuuriyadda Jabuuti.
Shirweynahan muhiimka ah ayaa waxaa ka soo qeyb galay madax sare iyo wakiillo ka kala socday Hey’adaha kubadda cagta ee caalamka iyo qaaradda Afrika, oo ay ka mid yihiin FIFA, CAF iyo CECAFA, kuwaas oo si dhow ula socday hannaanka doorashada hoggaanka cusub ee ururka, laguna ansixiyey xubnaha ka mid noqonaya golaha fulinta ee CECAFA.
Doorashada Mudane Cali Shiine ayaa si cad u muujinaysa kalsoonida buuxda ee ay xiriirrada kubadda cagta ee dalalka xubnaha ka ah CECAFA ku qabaan hoggaankiisa, khibraddiisa iyo doorka firfircoon ee uu Xiriirka Kubadda Cagta Soomaaliya ka ciyaaray dib-u-dhiska, horumarinta iyo kor u qaadista kubadda cagta dalka iyo guud ahaan gobolka Bariga iyo Bartamaha Afrika.
Xilka Madaxweyne Ku-xigeenka CECAFA, oo uu hayn doono muddo afar sano ah, ayaa la filayaa in uu Mudane Cali Shiine kaalin muuqata ka qaato xoojinta iskaashiga u dhexeeya dalalka xubnaha ka ah ururka, horumarinta iyo tayeynta tartamada heer gobol, kobcinta barnaamijyada tababarka ciyaartoyda, tababarayaasha iyo garsoorayaasha, iyo hagaajinta hannaanka maamulka iyo maamul-wanaagga kubadda cagta ee gobolka.
Sidoo kale, xilkan cusub ayaa fursad u noqonaya in kor loo qaado matalaadda Soomaaliya ee goleyaasha hoggaamineed ee kubadda cagta gobolka, isla markaana la xoojiyo dadaallada lagu horumarinayo ciyaaraha, gaar ahaan kubadda cagta, si ay uga mid noqoto aaladaha mideeya dhalinyarada, dhiirrigeliya nabadda, isla markaana gacan ka geysta horumarinta bulshada.
Doorashada Cali Shiine ayaa lagu tilmaamay guul taariikhi ah oo u soo hoyatay kubadda cagta Soomaaliya, taas oo muujinaysa horumarka iyo dib-u-soo-noqoshada muuqata ee uu Xiriirka Kubadda Cagta Soomaaliya ku tallaabsaday sannadihii u dambeeyay.
