Muqdisho – May 11, 2026 – Taliyaha Ciidanka Boliiska Soomaaliyeed, Sareeye Guuto Mahdi Cumar Muumin (Macalin Mahdi), ayaa si adag uga hadlay xaaladda amni ee Caasimadda Muqdisho, isaga oo digniin culus u diray siyaasiyiinta, xildhibaannada iyo mas’uuliyiinta lagu tuhunsan yahay inay door ku leeyihiin abaabullo rabshado iyo falal halis ku ah xasilloonida magaalada.
Qoraal rasmi ah oo lagu baahiyay baraha warbaahinta Ciidanka Boliiska Soomaaliyeed ayaa lagu sheegay in cid kasta oo lagu helo inay ku lug leedahay dhiirrigelinta rabshadaha, dhiig-daadinta ama falalka khalkhalgelinaya amniga guud lala xisaabtami doono.
Taliyaha ayaa sheegay in qofka xil dowladeed haya ama ah xildhibaan aan looga oggolaan doonin inuu ku takri-falo masuuliyadda qaranka si uu u abuuro qalalaase siyaasadeed ama amni darro.
“Qof xildhibaan ah ama mas’uul hore xil u soo qabtay oo rabsho iyo dhiig-daadin doonaya inuu saameyn siyaasadeed ku raadiyo waa arrin lid ku ah tarjumeeysa masuuliyad-darro iyo xilkasnimo la’aan, gacanta ayaana laga qabanayaa isaga iyo cid kasta oo carqalad ku ah amniga iyo xasilloonida Caasimadda,” ayuu yiri Taliye Macalin Mahdi.
Hadalka Taliyaha oo Kusoo Beegmay Xiisado Siyaasadeed
Hadalkan adag ayaa kusoo aadaya xilli magaalada Muqdisho ay ka jiraan xiisado siyaasadeed oo sii kordhaya, kadib hadallo is-dhaafsi ah oo u dhexeeya dowladda federaalka iyo qaar kamid ah siyaasiyiinta mucaaradka.
Maalmihii ugu dambeeyay waxaa magaalada laga dareemayay dhaq-dhaqaaqyo siyaasadeed, abaabulo bannaanbaxyo iyo walaac laga qabo isku dhacyo ka dhasha muranka siyaasadeed ee hareeyay arrimaha doorashooyinka iyo amniga caasimadda.
Hay’adaha ammaanka ayaa horey u shaaciyay inay xoojiyeen sugidda amniga Muqdisho, iyadoo ciidamo dheeraad ah la geeyay goobaha muhiimka ah ee magaalada si looga hortago falal amni-darro ama isku dayo lagu qalqal gelinayo nabadda.
Dowladda oo Ku Baaqday Xasillooni
Mas’uuliyiinta dowladda federaalka ayaa marar badan ku celceliyay in shacabka iyo siyaasiyiintuba ay ilaaliyaan xasilloonida, islamarkaana laga fogaado hadallo iyo ficillo horseedi kara rabshado.
Dowladda ayaa sidoo kale sheegtay in xorriyadda aragtida iyo bannaanbaxyadu ay yihiin xuquuq dastuurku dammaanad qaaday, balse aysan jiri doonin wax loo adeegsan karo hurinta colaado, hub sharci darro ah ama falal dhaawacaya amniga guud ee dalka.
Dhanka kale, falanqeeyayaal siyaasadeed ayaa aaminsan in hadalka kasoo baxay Taliyaha Ciidanka Boliiska uu fariin toos ah u yahay dhinacyada siyaasadda isku haya Muqdisho, iyadoo la isku dayayo in laga hortago xaalad amni oo kasii darta caasimadda.
Shacabka oo Loogu Baaqay Is-Deggenaansho
Ciidanka Boliiska Soomaaliyeed ayaa ugu dambeyn shacabka ugu baaqay inay la shaqeeyaan hay’adaha amniga, isla markaana ay ka fogaadaan wax kasta oo dhaawici kara nabadda iyo wada noolaanshaha bulshada.
Waxaa sidoo kale lagu adkeeyay in tallaabo sharci ah laga qaadi doono cid kasta oo lagu helo abaabul amni-darro, rabshado ama falal lidi ku ah xasiloonida Muqdisho.
