Dhuusamareeb, Soomaaliya — May 14, 2026 – Taliyaha Ciidanka Xoogga Dalka Soomaaliyeed, Ibraahim Maxamed Maxamuud, ayaa maanta gaaray magaalada Dhusamareb ee caasimadda maamulka Galmudug, halkaas oo uu uga bilaabanayo safar la xiriira dardargelinta howlgalada amni iyo dagaallada ka dhanka ah kooxda Al-Shabaab.
Wafdiga uu hoggaaminayay Taliyaha Ciidanka Xoogga Dalka ayaa si diirran loogu soo dhoweeyay garoonka diyaaradaha magaalada Dhuusamareeb, waxaana halkaasi kusoo dhaweeyay saraakiil sare oo ka tirsan Ciidanka Xoogga Dalka Soomaaliyeed, kuwaas oo uu hoggaaminayay Taliyaha Qeybta 21-aad ee Ciidanka Xoogga Dalka.
Safarka Taliyaha ayaa kusoo aadaya xilli ciidamada dowladda Soomaaliya ay wadaan howlgallo ballaaran oo ka dhan ah kooxda Al-Shabaab, gaar ahaan deegaannada maamulka Galmudug iyo gobollada bartamaha dalka, halkaas oo muddooyinkii dambe ay ka socdeen gulufyo militari oo lagu xaqiijinayo amniga iyo xoreynta deegaannada ay weli ku sugan yihiin maleeshiyaadka kooxda.
Ilo amni ayaa sheegaya in intii uu ku sugan yahay Dhuusamareeb uu Taliyuhu kulamo la qaadan doono saraakiisha ciidamada, maamulka Galmudug iyo qeybaha kala duwan ee laamaha amniga, si loo xoojiyo wada shaqeynta howlgalada socda iyo qorsheyaasha cusub ee lagu sugayo amniga gobolka.
Mas’uuliyiinta ciidamada ayaa tilmaamay in socdaalka Taliyaha uu qeyb ka yahay dadaallada dowladda Federaalka Soomaaliya ay ku xoojinayso howlgalada ka dhanka ah Al-Shabaab, iyadoo mudnaanta la siinayo dib u xoreynta deegaannada ay wali kooxdaasi ku dhuumaaleysanayaan.
Sidoo kale, booqashadan ayaa la rumeysan yahay inay kor u qaadi doonto niyadda ciidamada ku sugan furimaha hore ee dagaalka, kuwaas oo maalmihii lasoo dhaafay waday howlgallo qorsheysan oo lagu burburinayo fariisimaha kooxda.
Dowladda Federaalka Soomaaliya ayaa muddooyinkii dambe sare u qaaday dagaalka ka dhanka ah Al-Shabaab, iyadoo iskaashi la sameyneysa shacabka deegaanka, ciidamada deegaanka iyo saaxiibada caalamiga ah si loo xoojiyo amniga loogana hortago weerarada kooxda.
Saraakiisha ciidamada ayaa mar kale caddeeyay in howlgalada socda ay sii socon doonaan ilaa laga xaqiijinayo amni buuxa iyo xasillooni waarta oo laga hirgeliyo deegaannada Galmudug iyo guud ahaan Soomaaliya.
