Muqdisho – May 11, 2026 – Ra’iisul Wasaaraha Xukuumadda Federaalka Soomaaliya, Mudane Xamza Cabdi Barre, ayaa maanta kulan miro-dhal ah la yeeshay qaar kamid ah odayaasha dhaqanka, waxgaradka, siyaasiyiinta iyo mas’uuliyiin dowladeed oo kasoo jeeda Gobolka Mudug, isagoo kala hadlay arrimo la xiriira dowlad-dhiska, horumarinta adeegyada bulshada, amniga iyo xasilloonida dalka.
Kulanka ayaa diiradda lagu saaray muhiimadda ay leedahay wada shaqeynta dowladda iyo bulshada rayidka ah, gaar ahaan odayaasha dhaqanka iyo waxgaradka oo door weyn ka qaata ilaalinta nabadda, dib-u-heshiisiinta iyo xal u helidda khilaafaadka ka dhex jira bulshada Soomaaliyeed.
Ra’iisul Wasaare Xamza Cabdi Barre ayaa bogaadiyay kaalinta muuqata ee ay odayaasha dhaqanka iyo siyaasiyiintu ku leeyihiin xoojinta dowladnimada iyo taageeridda dadaallada lagu dhisayo Soomaaliya oo nabad ah, mideysan, isla markaana leh nidaam dowladeed oo shaqeynaya.
“Dowladda Federaalka Soomaaliya waxaa ka go’an taageeridda dadaallada nabadeed iyo xoojinta wada noolaanshaha shacabka Soomaaliyeed. Odayaasha dhaqanka iyo waxgaradka waa laf-dhabarta bulshada, waxayna door muhiim ah ku leeyihiin ilaalinta xasilloonida iyo isku duubnida ummadda,” ayuu yiri Ra’iisul Wasaaraha.
Odayaasha dhaqanka iyo siyaasiyiinta kasoo jeeda Gobolka Mudug ayaa dhankooda muujiyay sida ay u garab taagan yihiin dowladnimada Soomaaliya iyo dadaallada dowladda Federaalka ay ku hirgelinayso doorashooyinka qof iyo codka ah ee ka bilaabmay gobollada dalka.
Waxay sidoo kale Ra’iisul Wasaaraha la wadaageen baahiyaha iyo caqabadaha ka jira deegaannada ay kasoo jeedaan, iyagoo codsaday in dowladda Federaalka ay dardargeliso adeegyada bulshada, horumarinta kaabeyaasha dhaqaalaha iyo xal u helidda xaaladaha amni iyo colaadeed ee mararka qaar ka dhaca Gobolka Mudug.
Ra’iisul Wasaare Xamza Cabdi Barre ayaa si gaar ah ugu baaqay in xoogga la saaro nabadaynta Gobolka Mudug, isagoo ku adkeeyay muhiimadda ay leedahay in si degdeg ah loo qaboojiyo colaadaha u dhexeeya beelaha walaalaha ah ee wada dega gobolka.
Waxa uu xusay in bulshada Mudug ay leeyihiin taariikh, dhaqan iyo derisnimo mideeya, taas oo muhiim ka dhigeysa in laga shaqeeyo nabad waarta iyo iskaashi bulsho.
Ugu dambeyn, odayaasha dhaqanka iyo waxgaradka kulanka ka qeyb galay ayaa Ra’iisul Wasaaraha u ballanqaaday inay si buuxda uga qeyb qaadan doonaan dadaallada lagu xoojinayo nabadda, dowladnimada iyo wadajirka bulshada Soomaaliyeed.
