Taliyaha Taliska Ciidamada Mareykanka ee Afrika (AFRICOM), General Michael Anderson, ayaa sheegay in Dowladda Mareykanka ay xoojinayso wada shaqeynta ay la leedahay dalalka ku yaalla Geeska Afrika, si si wadajir ah wax looga qabto caqabadaha amni ee ka taagan xeebaha gobolka, kuwaas oo ay ka mid yihiin kalluumaysiga sharci-darrada ah, kalluumaysiga aan la nidaamin, iyo falalka burcad-badeednimo.
General Anderson ayaa carrabka ku adkeeyay in dadaalladan ay diiradda saarayaan kobcinta awoodda hay’adaha amniga ee dalalka gobolka, si ay u yeeshaan karti buuxda oo ay ku ilaashadaan xuduudahooda badda iyo berrigaba, una xaqiijiyaan badqabka maraakiibta ganacsiga iyo kalluumaysatada. Wuxuu sidoo kale xusay in arrintan ay noqotay mid sii kordhaysa ahmiyaddeeda, maadaama la dareemayo isku-xirnaan isa soo taraysa oo u dhexeysa kooxaha hubeysan ee ka hawlgala gobolka.
Waxaa si gaar ah loo soo hadal qaaday eedeymo sheegaya in kooxda Xuutiyiinta Yemen ay hub u soo tahriibiyaan gudaha Soomaaliya, hubkaas oo la rumeysan yahay in uu gacanta u galo kooxda Al-Shabaab, taasoo sii hurinaysa halista amni ee gobolka iyo midda caalamkaba.
Qodobadan ayaa qeyb ka ahaa ajandaha kulamo heer sare ah oo toddobaadkii hore ka dhacay dalal ka tirsan gobolka, kuwaas oo ay ka qeybgaleen Ku-xigeenka Xoghayaha Arrimaha Dibadda ee Mareykanka, Christopher Landau, iyo General Anderson. Labadan mas’uul ayaa la kulmay hoggaamiyeyaasha Itoobiya, Kenya iyo Jabuuti, iyagoo kala hadlay sidii loo xoojin lahaa iskaashiga amniga iyo doorka dal kasta uu ka qaadan karo sugidda xasilloonida gobolka.
General Anderson ayaa sidoo kale shaaciyay in Mareykanku uu diyaarinayo istaraatiijiyad amni oo dhammaystiran, taas oo isku xiraysa arrimaha amniga iyo horumarinta dhaqaalaha, si loo helo natiijo waarta. Wuxuu sheegay in tani ay sababtay in uu ka mid noqdo wafdiga uu hoggaaminayay Ku-xigeenka Xoghayaha Arrimaha Dibadda intii lagu guda jiray booqashadii gobolka.
Intii uu joogay Itoobiya, General Anderson wuxuu ka qeyb galay xuska sannad-guurada 90aad ee Ciidamada Cirka Itoobiya, kuwaas oo la aasaasay sannadkii 1935 xilli uu dalkaasi ku jiray duruufo adag. Wuxuu xusay in Mareykanku door muuqda ku lahaa aas-aaskii ciidamadaas, gaar ahaan Colonel John Robinson, isaga oo tilmaamay in iskaashigaas amni uu markii dambe horseeday horumar dhaqaale oo la taaban karo, sida kobaca shirkadda diyaaradaha Ethiopian Airlines.
“Taariikhda ayaa ina tusaysa in iskaashi amni oo adag uu sababi karo maalgashi dhaqaale iyo horumar waara oo mustaqbalka ah,” ayuu yiri General Anderson.
Kadib booqashadiisii Itoobiya, General Anderson wuxuu u gudbay Kenya, halkaas oo uu ka qeyb galay xafladda dhagax-dhigga saldhig cusub oo ay yeelan doonaan Ciidamada Badda Kenya oo ku yaalla Manda Bay. Saldhiggan cusub, oo ay si wadajir ah u maalgelinayaan Mareykanka iyo Kenya, ayaa lagu wadi doonaa mashruuc ay ku jirto waddo diyaaradeed oo dhererkeedu gaarayo 10,000 oo feet, taas oo la filayo inay door weyn ka qaadato taageeridda howlgalada lagula dagaallamayo kooxaha argagixisada ee gobolka.
General Anderson ayaa xilka Taliyaha AFRICOM la wareegay bishii Agoosto ee sannadkii hore, kaddib markii uu hawlgab noqday General Michael Langley. Wuxuu sheegay in tan iyo markii uu xilka qabtay uu xoogga saarayay dhisidda xiriirro dhow oo uu la yeesho dalalka Afrika, isaga oo bilihii ugu horreeyay ku mashquulsanaa kulamo iyo booqashooyin uu ku doonayay in uu si qoto dheer u fahmo baahiyaha amni ee qaaradda.
