MUQDISHO — Safaaradda Jamhuuriyadda Jabuuti ee Soomaaliya ayaa sheegtay in ciidamada howlgalka Midowga Afrika ee Taageerada iyo Xasilinta Soomaaliya (AUSSOM) ay iska caabiyeen weerar ka dhacay agagaarka Garoonka Diyaaradaha Ugaas Khaliif ee magaalada Beledweyne, isla markaana ay ka hortageen in garoonka la qabsado.
War-saxaafadeedka safaaradda, oo ku qoran afka Faransiiska, laguna taariikheeyay 20-ka Nofeembar 2026, ayaa lagu sheegay in dhacdadu ay timid 19-kii Nofeembar, abaare 1:00 duhurnimo. Safaaraddu waxay caddeysay inay xiriir la sameysay taliska Qaybta Afraad ee AUSSOM si ay ula socoto xaaladda, ugana hesho xog ku saabsan wixii ka dhacay agagaarka garoonka.
“Ciidamada howlgalka ayaa iska caabiyay weerarka, waxayna ka hortageen in garoonka la qabsado,” ayaa lagu yiri war-saxaafadeedka.
Safaaradda ayaa sidoo kale sheegtay in taliska Qaybta Afraad uu xaqiijiyay inaan wax dhimasho ama dhaawac ah soo gaarin ciidamada Jabuuti ee loo yaqaan “Hiil Walaal” ee ku sugan goobta.
Xaqiijinta ku saabsan khasaaraha ayaa si gaar ah u khusaysa ciidamada Jabuuti. War-saxaafadeedku ma bixin faahfaahin ku saabsan cidda weerarka soo qaadday, muddada uu socday ama khasaare soo gaaray dhinacyo kale.
Safaaraddu waxay qoraalkeeda ku adkaysay in joogitaanka ciidamada Jabuuti ee Soomaaliya uu qayb ka yahay ballanqaadka Jamhuuriyadda Jabuuti ee taageeridda dadaallada nabad ilaalinta, xoojinta amniga iyo xasilloonida Jamhuuriyadda Federaalka Soomaaliya.
Waxay sidoo kale tilmaantay in ciidamadaasi ay door ku leeyihiin gargaarka iyo garab istaagga shacabka Soomaaliyeed, gaar ahaan bulshada ku nool gobolka Hiiraan.
War-saxaafadeedkan ayaa faahfaahin ka bixinaya mowqifka safaaradda iyo xogta ay ka heshay taliska Qaybta Afraad ee AUSSOM, kaddib xiisaddii amni ee ka dhacday agagaarka Garoonka Diyaaradaha Ugaas Khaliif ee Beledweyne.












