Muqdisho | September 12, 2026 — Guddoomiyaha Golaha Shacabka ee Baarlamaanka Jamhuuriyadda Federaalka Soomaaliya, Mudane Cabdulqaadir Maxamed Nuur (Jaamac), ayaa magaalada Muqdisho xaflad sagootin ah ugu sameeyay Safiirka Turkiga u fadhiya Soomaaliya, Danjire Alper Aktaş. Danjiraha ayaa soo gabagabeeyay muddo-xileedkiisii diblomaasiyadeed ee Soomaaliya, waxaana la filayaa inuu dhowaan dalkiisa ku laabto.
Xafladda waxaa ka qaybgalay wasiirro, xildhibaanno ka tirsan labada aqal ee Baarlamaanka Federaalka Soomaaliya, diblomaasiyiin, saraakiil, arday wax ku soo bartay Turkiga iyo marti-sharaf kale.
Mas’uuliyiintii munaasabadda ka hadlay ayaa Dowladda Turkiga uga mahadceliyay taageerada ay siisay Soomaaliya iyo xiriirka walaaltinimo ee ka dhexeeya labada dal.
Danjire Alper Aktaş ayaa sheegay inay sharaf u ahayd inuu Soomaaliya ka hawlgalo, isla markaana uu ku faraxsan yahay muddadii uu dalka joogay. Wuxuu tilmaamay in xiriirka Soomaaliya iyo Turkiga uu marayo heer wanaagsan, iyadoo labada dal ay iska kaashadaan amniga, dhaqaalaha, waxbarashada, caafimaadka iyo horumarinta kaabeyaasha dhaqaalaha.
Danjiraha ayaa sidoo kale ka hadlay qorshayaal la xiriira horumarinta tiknoolajiyadda. Sida uu sheegay, waxaa la qorsheynayaa in sannadka 2027 Soomaaliya laga hirgeliyo xarun laga diro dayax-gacmeedyada, isla markaana dalka laga diro dayax-gacmeedkii ugu horreeyay. Waxa uu intaas ku daray in dhowaan maraakiib ka qayb qaadan doona hawlaha ka socda xeebaha dalka ay soo gaari doonaan Soomaaliya.
Guddoomiyaha Golaha Shacabka, Mudane Cabdulqaadir Maxamed Nuur (Jaamac), oo gebagebadii xafladda hadlay, ayaa dib u xusuusiyay taariikhda xiriirka Soomaaliya iyo Turkiga, marxaladihii uu soo maray iyo heerka uu maanta gaaray.
Guddoomiyaha ayaa sheegay in Turkigu Soomaaliya u fidiyay taageero aan la illoobi karin, gaar ahaan xilliyadii adkaa ee dalku garab istaagga u baahnaa. Wuxuu xusay in shacabka Soomaaliyeed ay xusuusan doonaan walaaltinimada iyo taageerada ay Dowladda iyo shacabka Turkigu muujiyeen.
Ugu dambayn, Guddoomiye Cabdulqaadir Maxamed Nuur ayaa Danjire Alper Aktaş uga mahadceliyay dadaalkii uu muddadii uu Soomaaliya joogay ku bixiyay xoojinta xiriirka labada dal, isagoo u rajeeyay guul iyo mustaqbal wanaagsan.
