Muqdisho – Taliyaha Hay’adda Sirdoonka iyo Nabadsugidda Qaranka (NISA), Mudane Mahad Maxamed Salaad, ayaa maanta degmada Gubadley ee Gobolka Banaadir kulan ballaaran oo looga hadlayay amniga iyo wada-shaqeynta bulshada la qaatay Imaam Daahir Imaam Maxamuud, xubno ka tirsan Xukuumadda Dan-Qaran, odayaal dhaqameedyo, qeybaha bulshada rayidka, saraakiil amni iyo masuuliyiinta maamulka degmada.
Kulanka ayaa diiradda lagu saaray xoojinta amniga degmada, dardargelinta wada-shaqeynta ka dhaxeysa hay’adaha ammaanka iyo shacabka, iyo sidii bulshada looga qeybgelin lahaa dadaallada lagu sugayo nabadda iyo xasilloonida Caasimadda Muqdisho.
Taliyaha NISA, Mudane Mahad Maxamed Salaad, ayaa sheegay in amniga uu yahay tiirka ugu muhiimsan ee lagu gaari karo horumar, dowladnimo iyo xasillooni waarta, isagoo xusay in ciidamada ammaanka ay wadaan dadaallo joogto ah oo lagu ciribtirayo kooxaha Khawaarijta iyo falalka lidiga ku ah amniga dalka.
Waxa uu bulshada degmada Gubadley ugu baaqay inay si dhow ula shaqeeyaan hay’adaha ammaanka, islamarkaana ay bixiyaan xogaha muhiimka ah ee ka qeyb qaadan kara ka hortagga falalka amni-darrada ah iyo dhaqdhaqaaqyada lagu carqaladeynayo nabadda shacabka Soomaaliyeed.
Dhankooda, qeybaha kala duwan ee bulshada ee ka qeybgalay kulanka ayaa si weyn u bogaadiyay dadaallada Dowladda Federaalka Soomaaliya iyo hay’adaha ammaanka ay ku bixinayaan sugidda amniga iyo xoojinta xasilloonida dalka. Waxay sidoo kale ballanqaadeen inay sii labanlaabi doonaan taageerada ay u hayaan ciidamada ammaanka, isla markaana ay door muuqda ka qaadan doonaan ilaalinta nabadgelyada iyo dowlad-dhiska.
Kulankan ayaa qeyb ka ah dadaallada ay dowladda iyo hay’adaha amniga ku xoojinayaan xiriirka bulshada iyo ciidamada ammaanka, si loo helo wada-shaqeyn dhab ah oo horseedi karta nabad waarta iyo amni sugan.
Waxaa soo tebiyay: Osman Jama
