Muqdisho, May 12, 2026 — Guddoomiyaha Maamulka Gobolka Banaadir ahna Duqa Magaalada Muqdisho, Dr. Xasan Maxamed Xuseen (Muungaab), ayaa maanta si rasmi ah xarigga uga jaray Xarunta Keydka Daawada ee Gobolka Banaadir, taas oo loo asteeyay inay door weyn ka qaadato horumarinta adeegyada caafimaadka iyo tayeynta nidaamka kaydinta iyo qaybinta dawooyinka ee caasimadda Muqdisho.
Munaasabadda xarig-jarka ayaa waxaa goob joog ka ahaa Danjiraha Dowladda Qatar u fadhiya Soomaaliya, Mudane Cabdalla Binu Saalim Al-Nuceymi, masuuliyiin ka tirsan maamulka gobolka, saraakiil caafimaad iyo marti sharaf kale.
Agaasimaha Agaasinka Caafimaadka Gobolka Banaadir, Dr. Cabdiraxmaan Axmed Maxamuud, oo ugu horreyn munaasabadda ka hadlay, ayaa sheegay in xaruntan cusub ay wax weyn ka tari doonto helitaanka dawooyin tayo leh iyo sidii si hufan loogu qaybin lahaa xarumaha caafimaadka ee degmooyinka Gobolka Banaadir.
“Xaruntani waxay muhiim u tahay kor u qaadista adeegyada caafimaadka, maadaama ay fududeyn doonto kaydinta saxda ah iyo gaarsiinta dawooyinka muhiimka ah ee bulshada u baahan,” ayuu yiri Agaasimaha Caafimaadka Gobolka Banaadir.
Guddoomiyaha Gobolka Banaadir ahna Duqa Muqdisho, Dr. Xasan Maxamed Xuseen (Muungaab), ayaa dhankiisa uga mahadceliyay Dowladda Qatar iyo Hay’adda Qatar Charity taageerada joogtada ah ee ay siiyaan shacabka Soomaaliyeed, gaar ahaan mashaariicda horumarineed ee la xiriira adeegyada bulshada.
Duqa Muqdisho ayaa tilmaamay in xaruntan cusub ay qeyb ka tahay dadaallada lagu xoojinayo kaabeyaasha caafimaadka ee caasimadda, isla markaana ay wax ka tari doonto baahiyaha sii kordhaya ee dhinaca caafimaadka bulshada.
Sidoo kale, Danjiraha Dowladda Qatar, Mudane Cabdalla Binu Saalim Al-Nuceymi, ayaa sheegay in Dowladda Qatar ay sii xoojin doonto taageerada ay la garab taagan tahay Soomaaliya, gaar ahaan dhinacyada caafimaadka, waxbarashada iyo adeegyada aasaasiga ah.
Danjiraha ayaa xusay in iskaashiga u dhexeeya Soomaaliya iyo Qatar uu yahay mid sii xoogeysanaya, islamarkaana saldhig u ah horumar waara iyo dib u dhiska adeegyada muhiimka ah ee bulshada Soomaaliyeed.
Furitaanka xaruntan cusub ayaa kusoo aadaya xilli ay Dowladda Hoose ee Muqdisho dadaal xooggan ugu jirto horumarinta adeegyada caafimaadka iyo tayeynta xarumaha bulshada ee caasimadda.
