Muqdisho — Wasiirka Gaashaandhigga Xukuumadda Federaalka Soomaaliya, Mudane Axmed Macallin Fiqi, ayaa maanta xafiiskiisa ku qaabilay Safiirka Boqortooyada Sweden u fadhiya Soomaaliya, Mudane Hans Henric Lundquist. Labada mas’uul ayaa ka wada hadlay xoojinta xiriirka labada dal, gaar ahaan iskaashiga dhinacyada difaaca iyo amniga.
Wadahadallada ayaa diiradda lagu saaray horumarinta xiriirka laba geesoodka ah iyo sidii loo sii xoojin lahaa iskaashiga Soomaaliya iyo Sweden. Waxaa sidoo kale kulanka lagu soo qaaday arrimo khuseeya danaha wadajirka ah ee labada dal.
Wasiir Axmed Macallin Fiqi ayaa Dowladda Sweden uga mahadceliyey taageerada ay siiso Soomaaliya. Waxa uu adkeeyey muhiimadda ay leedahay sii xoojinta wada-shaqaynta labada dowladood, iyadoo arrimaha difaaca iyo amnigu ay ka mid ahaayeen qodobbada ugu waaweyn ee kulanka looga hadlay.
Kulanka waxaa sidoo kale ka qaybgalay Kaaliyaha Taliska Ciidanka Xoogga Dalka Soomaaliyeed, Sarreeye Gaas Maxamed Cali Bariise.
