DOOXA, Qatar — Soomaaliya ayaa shir ka socda magaalada Dooxa ku soo bandhigtay horumarka ay ka samaysay maamulka hawada iyo adeegyada duulista rayidka, iyadoo tilmaantay muhiimadda hawadeedu u leedahay isku socodka diyaaradaha gobolka iyo kuwa caalamka.
Maareeyaha Guud ee Hay’adda Duulista Rayidka Soomaaliyeed (SCAA), Axmed Macalin Xasan, ayaa arrimahan ka hadlay intii uu ka qaybgalayey shirkii siddeedaad ee Agaasimeyaasha Guud ee Hay’adaha Duulista Rayidka ee Bariga Dhexe, oo loo yaqaan DGCA-MID/8.
Axmed ayaa sheegay in hawada Soomaaliya ay door muhiim ah ka qaadatay isku xirka duulimaadyada rayidka, gaar ahaan xilliyada ay xaaladaha amni ee gobolka saameeyeen hawlgallada diyaaradaha iyo marinnada ay isticmaalaan.
Waxa uu tilmaamay in goobta ay Soomaaliya kaga taallo gobolka ay hawadeeda siinayso muhiimad gaar ah. Wuxuu sidoo kale xusay in horumarinta adeegyada hagidda diyaaradaha ay qayb ka tahay dadaalka lagu xoojinayo kaalinta dalka ee duulista caalamiga ah.
“Maanta waxaan joognaa meel dunidu nagu tiirsan tahay,” ayuu yiri Axmed, isagoo ka hadlayey adeegga ay hawada Soomaaliya u fidiso diyaaradaha isaga kala goosha gobolka iyo dunida inteeda kale.
Maareeyuhu wuxuu horumarka la sameeyey ku xiriiriyey casriyeynta nidaamyada duulista, adeegsiga qalab tiknoolajiyadeed oo casri ah iyo shaqaalaha leh aqoonta iyo khibradda loo baahan yahay. Arrimahaas ayuu sheegay inay sare u qaadeen sumcadda Soomaaliya iyo kalsoonida lagu qabo adeegyada hawadeeda.
Maamulka hawadu wuxuu u baahan yahay xiriir joogto ah, xog sax ah iyo isku-duwid u dhexeysa hay’adaha hagidda diyaaradaha. Sidaas darteed, horumarinta qalabka iyo xirfadaha shaqaalaha ayaa muhiim u ah badbaadada duulimaadyada iyo joogtaynta adeegga, gaar ahaan marka xaaladaha gobolka ay keenaan isbeddel ku yimaadda marinnada diyaaradaha.
Axmed ayaa intaas ku daray in ka qaybgalka shirku uu Soomaaliya u yahay fursad ay ku xoojiso xiriirka hay’adaha duulista ee gobolka, kula wadaagto khibradaha, ugana qayb qaadato wada-hadallada ku saabsan mustaqbalka gaadiidka cirka.
Shirka oo galay maalintiisa labaad waxaa martigelinaysa Hay’adda Duulista Rayidka Qatar (QCAA), iyadoo kaashanaysa Xafiiska Gobolka Bariga Dhexe ee Hay’adda Duulista Rayidka Adduunka (ICAO). Waxaa ka qaybgalaya madaxda hay’adaha duulista rayidka ee dalalka gobolka iyo dalal kale, iyo wakiillo ka socda ururrada caalamiga ah iyo kuwa gobolka.
Ajandaha waxaa ka mid ah badbaadada duulista, hagidda diyaaradaha, ilaalinta nidaamyada dijitaalka ah iyo yaraynta saameynta gaadiidka cirka ku leeyahay deegaanka. Waxa kale oo lagu falanqaynayaa fududeynta adeegyada duulista iyo xoojinta iskaashiga dalalka.
Ka qaybgalayaashu waxay sidoo kale ka wada hadlayaan hirgelinta barnaamijka amniga duulista ee Bariga Dhexe iyo caqabadaha la xiriira diyaaradaha aan duuliyaha lahayn. Qodobadan ayaa muujinaya baahida loo qabo in hay’adaha duulistu la jaanqaadaan tiknoolajiyada cusub, iyagoo ilaalinaya badbaadada iyo habsami-u-socodka gaadiidka cirka.
Soomaaliya ayaa madasha ku soo bandhigtay farriin ku saabsan muhiimadda isku dhafan ee goobta ay ku taallo, tayada adeegyada hawadeeda iyo iskaashiga ay la leedahay dalalka kale. Sii wadidda casriyeynta iyo kobcinta xirfadaha shaqaalaha ayaa saldhig u noqon kara xoojinta doorkaas iyo kalsoonida lagu qabo maamulka hawada dalka.
