Abidjan, Côte d’Ivoire – May 12, 2026 – Wafdi heer sare ah oo ka socda Dowladda Federaalka Soomaaliya ayaa ka qeyb galay Shirka Caalamiga ah ee ID4Africa 2026 oo ka furmay magaalada Abidjan ee dalka Côte d’Ivoire, kaas oo ay isugu yimaadeen dowlado, hay’ado caalami ah iyo khubaro ku xeel dheer aqoonsiga dijitaalka ah iyo adeegyada casriga ah ee dowladda.
Wafdiga Soomaaliya waxaa hoggaaminayay Maareeyaha Guud ee Hay’adda Aqoonsiga iyo Diiwaangelinta Qaranka (NIRA), Mudane Cabdiweli Cali Cabdulle (Timacadde), waxaana qeyb ka ahaa masuuliyiin sare oo ka socday hay’adaha dowladda sida NIRA, SPS, SBA iyo hay’ado kale oo muhiim ah.
Shirka ID4Africa 2026 ayaa sanadkan diiradda lagu saaray sidii dalalka Afrika ay u hirgelin lahaayeen nidaamyo casri ah oo dhijitaal ah, kuwaas oo fududeynaya adeegyada dowladda, xaqiijinta aqoonsiga muwaadiniinta, kobcinta dhaqaalaha dhijitaalka ah iyo xoojinta amniga xogta shacabka.
Ka qeyb-galka Soomaaliya ee shirkan ayaa loo arkaa tallaabo muhiim ah oo lagu horumarinayo nidaamka Aqoonsiga Qaranka Soomaaliyeed, iyadoo dowladda Federaalka ay dadaal xooggan ugu jirto hirgelinta adeegyo casri ah oo ku saleysan tiknoolajiyadda iyo maamulka xogta muwaadiniinta.
Maareeyaha Guud ee NIRA, Mudane Cabdiweli Cali Cabdulle (Timacadde), ayaa sheegay in Soomaaliya ay ka go’an tahay dhismaha nidaam aqoonsi qaran oo casri ah, kaas oo sahli kara helitaanka adeegyada dowladda, horumarinta maaliyadda dhijitaalka ah, amniga, iyo isku xirnaanta hay’adaha kala duwan ee dowladda.
Waxa uu xusay in shirkan uu Soomaaliya u yahay fursad muhiim ah oo lagu xoojinayo iskaashiga caalamiga ah, laguna baranayo khibradaha dalalka kale ee Afrika ee ku guuleystay hirgelinta nidaamyada aqoonsiga dijitaalka ah.
Shirka ID4Africa ayaa sidoo kale lagu soo bandhigay teknoolajiyado cusub oo la xiriira aqoonsiga biometric-ga, ilaalinta xogta, adeegyada dijitaalka ah iyo xalalka casriga ah ee lagu horumarin karo maamulka dowliga ah.
Ka qeyb-galka wafdiga Soomaaliya ayaa muujinaya dadaallada sii kordhaya ee dowladda Federaalka Soomaaliya ay ugu jirto casriyeynta adeegyada dowladda iyo dhismaha hannaan dijitaal ah oo la jaanqaadi kara isbeddelka tiknoolajiyadda ee dunida casriga ah.
Dowladda Soomaaliya ayaa sanadihii la soo dhaafay xoogga saartay horumarinta Aqoonsiga Qaranka, iyadoo NIRA ay door muhiim ah ka qaadatay diiwaangelinta muwaadiniinta iyo hirgelinta nidaam mideysan oo aqoonsi qaran ah, kaas oo muhiim u ah qorshayaasha horumarineed iyo adeegyada dowliga ah ee dalka.
