HOPKINS, Minnesota — Dacwad-oogayaasha degmada Hennepin ayaa Talaadadii nin 25 jir ah ku soo oogay dacwado la xiriira isku day dil darajada labaad iyo gaari-dhac darajada koowaad, kadib weerar dhaawacyo halis ah u geystay Mohamed Yusuf, oo ah darawal Soomaali Mareykan ah oo ka shaqeeya adeegga Uber.
Eedeysanaha, Samit Apurva Patel, oo deggan magaalada Hopkins, ayaa weli ku jira xabsiga. Mohamed ayaa isbitaalka kula tacaalaya dhaawacyo aad u daran, iyadoo qoyskiisu sheegay inuu koomo ku jiro.
Sida ku xusan dacwadda, Mohamed walaalkiis ayaa taleefanka kula hadlayay markii uu weerarku dhacayay. Walaalka ayaa baarayaasha u sheegay inuu maqlay rakaabka oo aflagaaddeynaya magaca Mohamed, ka hor inta aysan xaaladdu isu beddelin qaylo iyo codad muujinaya in darawalka la weerarayay.
Diiwaannada Uber ee lagu soo xigtay dacwadda ayaa muujinaya in Mohamed uu Patel ka qaaday meel u dhow baar ku yaalla waqooyi-bari magaalada Minneapolis, abaare 12:47 habeenimo ee Sabtidii. Xilligaas, Mohamed iyo walaalkiis, oo isaguna Uber ka shaqeeya, ayaa taleefanka ku wada hadlayay iyagoo labaduba shaqaynaya.
Walaalka ayaa sheegay inuu maqlay Patel oo Mohamed weydiinaya: “Magacaygu waa maxay?” Mohamed ayaa ugu jawaabay “Sam,” kadibna isaga ayaa magaciisa sheegay.
Sida dacwadda lagu sheegay, Patel ayaa markaas adeegsaday eray aflagaaddo ah, kuna yiri Mohamed: “Ma jecli magacaas.”
Markii walaalkiis uu walaac ka muujiyay sida rakaabku ula dhaqmayay, Mohamed ayaa ku jawaabay: “Waa caadi, wuu sakhraansan yahay.”
Xaaladda ayaa sii xumaatay markii Patel uu ku adkaystay in Mohamed uu leexdo, halkii uu ka sii wadi lahaa jidkii ku wajahnaa guriga Patel. Walaalka ayaa baarayaasha u sheegay inuu dabadeed maqlay Mohamed oo af-Soomaali ku qaylinaya.
“Suun ayuu igu ceejinayaa,” ayuu Mohamed yiri, sida ku xusan dacwadda.
Halganka ayaa socday dhowr daqiiqo, ka hor inta uusan codku ka aamusin khadka. Walaalka ayaa markaas maqlay Mohamed oo qaylinaya: “Ilaahayow, gaariga ayuu korkayga ku waday, wuu i dul marayay.”
Intaas kadib, walaalka ayaa sheegay inuu maqlayay oo keliya codka Patel, kaas oo aflagaaddeeyay markii uu ka codsaday inuu Mohamed la hadlo. Saraakiisha booliska ayaa markii dambe gudaha gaariga Mohamed ee Toyota RAV4 ka helay taleefan uu weli ka furnaa wicitaankaasi.
Booliska ayaa raadraacay saacadda casriga ah ee Mohamed, taas oo ku hoggaamisay aag u dhow Hopkins Crossroad iyo Minnetonka Boulevard, oo ku yaalla Hopkins, galbeedka Minneapolis. Waxay sidoo kale adeegsadeen diyaarad aan duuliye lahayn oo lagu ogaan karo kulaylka jirka.
Saraakiisha ayaa Mohamed ka helay bohol ay dhir cufan ku taallay, oo waddada u jirtay qiyaastii 15 fuudh. Goobta waxaa sidoo kale laga helay raadad taayirro oo muujinayay gaari galay kana baxay bohosha.
Sida ku cad xogta GPS-ka Uber ee dacwadda lagu soo xigtay, gaariga ayaa bohosha galay 1:07 habeenimo, wuxuuna ka baxay qiyaastii 20 ilbiriqsi kadib. Diiwaannadu waxay sidoo kale muujinayaan in gaarigu laba jeer oo kale ag maray goobta, ka hor inta uusan u dhaqaaqin guriga Patel.
Mohamed ayaa waxaa soo gaaray jab feeraha iyo lugta ah, dhaawacyo laf-dhabarta ah, sambabbada oo dumay iyo dhiig-bax daran oo gudaha jirka ah. Sida dacwadda lagu sheegay, dhakhaatiirtu waxay ku khasbanaadeen inay ka saaraan dhowr xubnood oo gudaha jirka ah sababo la xiriira dhiig-baxa, waxaana lagu tilmaamay fursaddiisa soo kabasho mid liidata.
Qoyska Mohamed ayaa sheegay inuu weli koomo ku jiro Isbitaalka Hennepin County Medical Center ee magaalada Minneapolis.
Dacwadaha ayaa la soo oogay maalin kadib markii xubno ka tirsan bulshada ay isugu soo baxeen bannaanka isbitaalka, iyagoo dalbanayay caddaalad, isla markaana cambaareynayay hadallada ka dhanka ah Soomaalida.
Booliska Hopkins ayaa sheegay in baarayaashu ay eegayaan dhammaan sababaha suurtagalka ah ee ka dambeeyay weerarka, oo ay ku jirto in nacayb ama eex ay qayb ka ahaayeen. Weli lama xaqiijin sababta weerarka, eedeymaha loo jeediyay Patel-na maxkamad laguma caddayn.











