MUQDISHO — Xoghayaha Joogtada ah ee Wasaaradda Gaashaandhigga, Yuusuf Cali Maxamed, ayaa kulan la yeeshay agaasimayaasha waaxyaha iyo shaqaalaha wasaaradda, kaas oo looga hadlay dardargelinta hawlaha shaqo iyo hirgelinta qorshayaasha mudnaanta leh.
Waxaa kulanka ku wehliyey Agaasimaha Guud ee Shaqaalaha iyo Taakulaynta, Ibraahim Aadan Ibraahim, iyo Agaasimaha Guud ee Difaaca, Cabdulqaadir Abuukar Maxamed.
Doodda ayaa xoogga lagu saaray sidii loo kordhin lahaa waxqabadka shaqaalaha, loo xoojin lahaa isla-xisaabtanka, loona hubin lahaa in shaqaale kasta uu guto waajibaadka saaran.
Yuusuf Cali Maxamed ayaa shaqaalaha ku boorriyey inay xoojiyaan wada-shaqaynta, korna u qaadaan tayada shaqadooda. Waxa uu adkeeyey in fulinta qorshayaasha iyo yoolalka wasaaraddu ay u baahan tahay hufnaan iyo xilkasnimo.
Kulanka ayaa qayb ka ahaa dadaallada wasaaradda ee lagu hagaajinayo habsami-u-socodka shaqada iyo tayada adeegyada ay bixiso.
