Madaxweynaha Jamhuuriyadda Federaalka Soomaaliya, Mudane Xasan Sheekh Maxamuud, ayaa maanta booqasho rasmi ah ku joogay magaalada Qaahira ee Jamhuuriyadda Carbeed ee Masar, halkaas oo uu wadahadallo miro-dhal ah kula yeeshay Madaxweynaha Masar, Mudane Cabdulfataax Al-Siisi. Kulankani wuxuu qeyb ka yahay dadaallada joogtada ah ee labada dal ku xoojinayaan xiriirka taariikhiga ah iyo iskaashiga istiraatiijiga ah ee dhinacyada amniga, horumarka, iyo siyaasadda gobolka.
Kaddib kulanka, labada Madaxweyne ayaa qabtay shir jaraa’id, iyaga oo si faahfaahsan uga warbixiyay qodobbadii muhiimka ahaa ee ay ka wada-hadleen. Labada hoggaamiye ayaa hoosta ka xarriiqay muhiimada ay leedahay ilaalinta xasilloonida iyo nabadda gobolka, kor u qaadista iskaashiga dhaqaalaha iyo horumarinta bulshooyinka, iyo taageerada caalamiga ah ee ay wadaagaan dhinacyada amniga iyo siyaasadda.
Madaxweyne Xasan Sheekh Maxamuud ayaa intii uu shirku socday sheegay in Soomaaliya ay si buuxda uga go’an tahay ilaalinta madax-bannaanideeda iyo midnimada dhuleed, isla markaana tallaabooyinka sharci-darrada ah ee Israa’iil ku aaddan aqoonsiga gobolka Waqooyi ee Soomaaliya (Somaliland) ay jebinayaan xeerarka caalamiga ah, Axdiyada Qaramada Midoobay iyo Midowga Afrika. Waxa uu xusay in tallaabooyinkaas ay abuuri karaan xiisado cusub iyo fursado ay ka faa’iideystaan kooxaha xagjirka ah ee ka shaqeeya xasillooni-darrada gobolka.
Madaxweyne Xasan Sheekh Maxamuud ayaa sidoo kale uga mahadceliyay Madaxweynaha Masar soo dhoweynta diirran iyo taageerada muuqata ee dowladdiisu ka geysaneyso garab istaagga Soomaaliya, gaar ahaan ilaalinta midnimada, madax-bannaanida, iyo dhismaha hay’adaha dowliga ah. Waxa uu xusay in taageeradan ay muhiimad weyn u leedahay shacabka Soomaaliyeed, isla markaana ay qaddarinayaan dadaallada Masar ee horumarinta iyo xasilloonida Soomaaliya.
Dhankiisa, Madaxweynaha Jamhuuriyadda Carbeed ee Masar, Mudane Cabdulfataax Al-Siisi, ayaa mar kale xaqiijiyay mowqifka cad ee dalkiisu ka taagan yahay arrimaha Soomaaliya, isaga oo adkeeyay ixtiraamka buuxa ee madax-bannaanida, wadajirka dhuleed, iyo faragelin la’aanta arrimaha gudaha ee Jamhuuriyadda Federaalka Soomaaliya. Madaxweynaha Masar ayaa tilmaamay muhiimadda istiraatiijiga ah ee Soomaaliya u leedahay gobolka, isla markaana ku adkeeyay in Masar ay sii wadi doonto taageerada ay la garab taagan tahay Soomaaliya dhinacyada amniga, horumarinta, iyo dhismaha hay’adaha dowliga ah.
Kulankani ayaa sidoo kale noqday fursad ay labada dhinac ku sii xoojiyeen iskaashiga istiraatiijiga ah ee dhinacyada ganacsiga, horumarinta dhaqaalaha, iyo ka shaqeynta xal u helidda caqabadaha bini’aadantinimo ee ka jira dalka. Labada Madaxweyne ayaa isla gartay in xiriirka Soomaaliya iyo Masar uu yahay mid istiraatiiji ah, laguna dhisayo iskaashi ku dhisan danaha labada dal iyo xasilloonida guud ee gobolka.
