Ra’iisul Wasaaraha Xukuumadda Jamhuuriyadda Federaalka Soomaaliya, Mudane Xamsa Cabdi Barre, ayaa maanta xafiiskiisa ku qaabilay wafdi heer sare ah oo ka socda Dowladda Jamhuuriyadda Federaalka Jarmalka, kaas oo uu hoggaaminayey Wasiiru-Dowlaha Iskaashiga Dhaqaalaha iyo Horumarinta, Mudane Niels Annen. Wafdiga ayaa waxaa sidoo kale ka mid ahaa Safiirka Dowladda Jarmalka u fadhiya Soomaaliya, Mudane Sebastian Groth.
Kulanka ayaa diiradda lagu saaray xoojinta iyo ballaarinta xiriirka iskaashi ee ka dhaxeeya Soomaaliya iyo Jarmalka, iyadoo si gaar ah loo falanqeeyey arrimaha horumarinta, gargaarka bini’aadantinimo, amniga, iyo wada-shaqeynta dhinaca siyaasadda. Labada dhinac ayaa hoosta ka xarriiqay muhiimadda ay leedahay sii wadidda iskaashiga istiraatiijiga ah ee labada dal, si loo taageero dadaallada dib-u-dhiska, xasillinta iyo horumarinta waarta ee Soomaaliya.
Ra’iisul Wasaaraha ayaa wafdiga Jarmalka la wadaagay warbixin faahfaahsan oo ku saabsan xaaladda guud ee dalka, isaga oo si gaar ah u xusay saameynta abaarta ba’an ee ka jirta qaybo ka mid ah Soomaaliya iyo baahida loo qabo in la kordhiyo gargaarka bini’aadantinimo. Waxa uu sidoo kale ka hadlay guulaha la taaban karo ee laga gaaray dagaalka ka dhanka ah kooxaha Khawaarijta, dadaallada lagu xasilinayo deegaannada laga xoreeyay cadowga, iyo qorshayaasha lagu xaqiijinayo amni waara.
Sidoo kale, Ra’iisul Wasaaraha ayaa wafdiga uga warramay horumarka ka socda dhinacyada siyaasadda iyo dowlad-dhiska, oo ay ka mid yihiin dardargelinta hirgelinta doorashooyinka tooska ah ee goleyaasha deegaanka, dhammaystirka hannaanka dib-u-eegista dastuurka, iyo gogosha wadahadal ee ay Dowladda Federaalka Soomaaliya u fidisay Golaha Mustaqbalka, si loo xoojiyo wada-tashiga qaran iyo midnimada bulshada.
Dhankiisa, Wasiiru-Dowlaha Iskaashiga Dhaqaalaha iyo Horumarinta ee Dowladda Jarmalka, Mudane Niels Annen, ayaa uga mahadceliyey Ra’iisul Wasaaraha soo dhoweynta iyo wada-xaajoodka miro-dhalka ah. Waxa uu carrabka ku adkeeyey in Dowladda Jarmalka ay muhiimad weyn siinayso xiriirka taariikhiga ah iyo saaxiibtinimada kala dhaxeysa Soomaaliya, isla markaana ay ka go’an tahay sii wadidda taageerada ay siiso Soomaaliya, gaar ahaan dhinacyada horumarinta, gargaarka bini’aadantinimo, iyo dhismaha hay’adaha dowliga ah.
Gabagabadii kulanka, Ra’iisul Wasaare Xamsa Cabdi Barre ayaa xaqiijiyey in Dowladda Federaalka Soomaaliya ay sii wadi doonto ka-qaybgalka firfircoon ee dadaallada caalamiga ah ee lagu xoojinayo nabadda, amniga iyo xasiloonida adduunka, gaar ahaan doorka ay Soomaaliya ka qaadanayso Golaha Ammaanka ee Qaramada Midoobay, oo ay xubin aan joogto ahayn ka tahay.
