MUQDISHO, Soomaaliya – Golaha Wasiirrada Jamhuuriyadda Federaalka Soomaaliya ayaa Khamiistii ku yeeshay Muqdisho kulankoodii caadiga ahaa ee toddobaadlaha ah, kaas oo ajandihiisu diiradda saarayay dhismaha amniga dalka iyo hawlgallada xoreynta ee socda. Kulanka oo uu guddoominayay Ra’iisul Wasaare Ku-xigeenka Labaad, Mudane Jibriil Cabdirashiid Xaaji Cabdi, ayaa sidoo kale lagu falanqeeyay hindisaha Dowladda Federaalka ee furitaanka waddo wadatashi siyaasadeed oo loo dhan yahay, kaas oo ay ka qeyb qaadanayaan dhinacyada kala duwan ee dalka.
Qayb muhiim ah oo kulanka ka mid ah ayaa lagu gorfeeyay xaaladda hawlgallada amniga ee ka socda goobaha. Golaha Wasiirradu waxay si weyn u bogaadiyeen Ciidamada Qalabka Sida ee Soomaaliya dadaalkooda naf-hurnimada leh ee ay ugu jiraan difaaca muwaadiniinta. Golaha ayaa si gaar ah u xusay guushii muhiimka ahayd ee shalay laga gaaray degmada xeebta ah ee Kudhaa, halkaas oo Ciidanka Qaranka ay si guul leh uga hortageen weerar ay soo qaadeen maleeshiyaadka Khawaarijta. Jawaabtii degdegga ahayd ee xirfadda ku dheehnayd ee ciidamada ayaa lagu soo afjaray khatartii, waxaana la xaqiijiyay badbaadada shacabka iyo amniga guud ee gobolka Jubbada Hoose.
Dhanka arrimaha sharci-dejinta iyo horumarinta, Golaha Wasiirradu waxay si aqlabiyad leh u ansixiyeen laba dukumeenti oo muhiim u ah isku xirka dalka iyo horumarkiisa dhaqaale. Golaha ayaa oggolaaday Heshiis Is-afgarad (MoU) oo ku saabsan Kormeerka Dekedaha (Port State Control – PSC) ee gobolka Badweynta Hindiya, kaas oo ay soo gudbisay Wasaaradda Dekedaha iyo Gaadiidka Badda, ujeeddadiisuna tahay xoojinta badbaadada iyo nidaaminta gaadiidka badda. Sidoo kale, Golaha Wasiirradu waxay ansixiyeen Siyaasadda Boostada Qaranka ee 2025–2030, oo ay diyaarisay Wasaaradda Isgaarsiinta iyo Teknoolojiyadda, taas oo hiigsanaysa casriyeynta adeegyada boostada iyo ku xidhiddooda dhaqaalaha dijitaalka ah shanta sano ee soo socota.
Intii uu socday kulanka, Wasiirradu waxay sidoo kale dhageysteen warbixinno ku saabsan Siyaasadda Maareynta Waxqabadka Isku-dhafan, taas oo ujeeddadeedu tahay kor u qaadidda hufnaanta hay’adaha dowladda. Sidoo kale, Golaha ayaa dib u eegay horumarka Shirka Wadatashiga Siyaasadeed ee Qaranka. Dowladda DanQaran ayaa mar kale xaqiijisay sida ay uga go’an tahay madashan wadatashiga, iyada oo carrabka ku adkaysay muhiimadda wada-hadal furan oo lagu xalliyo aragtiyada siyaasadeed ee kala duwan, laguna hormariyo geeddi-socodka dimuqraadiyadda dalka.
