Baydhabo — Xukuumadda Koonfur Galbeed ayaa magaalada Baydhabo ku soo bandhigtay warbixin ku saabsan waxqabadkeeda 100-kii maalmood ee ugu horreeyey, munaasabad uu ka qaybgalay hoggaamiyaha maamulka, Sheekh Aadan Maxamed Nuur (Madoobe).
Munaasabadda waxaa sidoo kale ka qaybgalay Wasiirka Xannaanada Xoolaha ee Xukuumadda Federaalka Soomaaliya, mas’uuliyiin ka tirsan labada gole ee Koonfur Galbeed, maamullada gobolka Baay iyo degmada Baydhabo, iyo wakiillo ka socday qaybaha bulshada.
Warbixinta la soo bandhigay ayaa lagu faahfaahiyey hawlaha ay xukuumaddu sheegtay inay ka qabatay amniga, dowlad-dhiska, caafimaadka, waxbarashada, kaabayaasha dhaqaalaha iyo arrimaha bani’aadannimada.
Waxaa sidoo kale lagu soo bandhigay qorshayaashii mudnaanta la siiyey, caqabadihii ka hor yimid fulintooda iyo tallaabooyinkii la qaaday si loo dardargeliyo shaqada hay’adaha maamulka iyo adeegyada dadweynaha.
Sheekh Aadan Maxamed Nuur ayaa bogaadiyey shaqada Golaha Wasiirrada iyo hay’adaha kale ee maamulka muddadaas. Waxa uu ku boorriyey inay sii wadaan qorshayaasha horumarineed, isla markaana xoojiyaan wada-shaqaynta hay’adaha.
Hoggaamiyaha Koonfur Galbeed ayaa sheegay in sugidda amniga, xoojinta dowladnimada, dib-u-heshiisiinta bulshada iyo horumarinta adeegyada aasaasiga ahi ay yihiin mudnaanta maamulka. Waxa uu adkeeyey in hawlahaas lagu saleeyo sidii shacabka loo gaarsiin lahaa adeegyo dowladeed oo tayo leh.
