Washington, Qaranimo Online – September 21, 2026: Maamulka Madaxweyne Donald Trump ayaa diyaarinaya cunaqabateyn ballaaran oo lagu soo rogayo Maxkamadda Caalamiga ah ee Dambiyada (ICC), taas oo la filayo in lagu dhawaaqo maalmaha soo socda, sida ay ku warrameen Wall Street Journal iyo Reuters.
Cunaqabateyntan ayaa lagu beegsan doonaa maxkamadda oo dhan, halkii laga bartilmaameedsan lahaa oo keliya garsoorayaasha iyo masuuliyiinta ICC. Tallaabada ayaa la xiriirta waarannadii qabashada ee maxkamaddu 2024 u jartay Ra’iisul Wasaaraha Israa’iil Benjamin Netanyahu iyo wasiirkii hore ee gaashaandhigga Yoav Gallant, kuwaas oo loo haysto eedeymo la xiriira dambiyo dagaal iyo dambiyo ka dhan ah aadanaha oo ka dhacay Gaza. Labada masuul ayaa beeniyay eedeymaha loo jeediyay.
Haddii la hirgeliyo, cunaqabateyntu waxay mamnuuci kartaa in muwaadiniinta iyo shirkadaha Mareykanku ay lacag, badeeco ama adeeg siiyaan ICC iyaga oo aan ruqsad ka haysan Waaxda Maaliyadda Mareykanka. Waxaa sidoo kale laga yaabaa inay maxkamadda ka hor istaagto isticmaalka doolarka, adeegyada bangiyada, tiknoolojiyadda iyo caymiska.
Masuuliyiinta ICC iyo khubaro sharci ayaa ka digay in tallaabadani ay carqaladeyn karto howlaha maalinlaha ah, shaqaaleysiinta baarayaasha iyo baaritaannada dambiyada dagaal ee ka socda dalal ay ka mid yihiin Suudaan, Liibiya, Myanmar iyo Ukraine.
Khubarada qaar ayaa Midowga Yurub ugu baaqay inuu dhaqaajiyo sharcigiisa ka hortagga cunaqabateynta shisheeye ee loo yaqaan Blocking Statute, si loo ilaaliyo shirkadaha iyo adeeg-bixiyeyaasha Yurub ee la shaqeeya maxkamadda.
Mareykanka ayaa horay cunaqabateyn ugu soo rogay masuuliyiin sare oo ICC ka tirsan, oo ay ku jiraan Madaxweynaha Maxkamadda Tomoko Akane, xeer-ilaaliyeyaal iyo garsoorayaal. Hase yeeshee, cunaqabateynta cusub weli si rasmi ah looma shaacin, waqtiga saxda ah ee lagu dhawaaqayana lama xaqiijin.
