Nouakchott, Mauritaaniya – 21 May 2026 — Safiirka cusub ee Dowladda Federaalka Soomaaliya u fadhiya Jamhuuriyadda Islaamiga ah ee Mauritaaniya, Mudane Yusuf Ahmed Hassan (Yusuf Jeego), ayaa maanta si rasmi ah warqadaha aqoonsiga danjirenimo ugu gudbiyay Madaxweynaha Mauritaaniya, Mudane Mohamed Ould Cheikh El Ghazouani, munaasabad ka dhacday Qasriga Madaxtooyada ee magaalada Nouakchott.
Munaasabadda gudbinta warqadaha aqoonsiga ayaa ku qabsoontay jawi xushmad, saaxiibtinimo iyo diblomaasiyad sare leh, taas oo ka tarjumeysay xiriirka walaaltinimo iyo iskaashiga taariikhiga ah ee ka dhexeeya Soomaaliya iyo Mauritaaniya. Madaxweynaha Mauritaaniya ayaa si diirran u soo dhoweeyay Safiirka cusub, isaga oo u rajeeyay guul iyo in uu door muuqda ka qaato xoojinta xiriirka labada dal.
Kulanka kadib gudbinta warqadaha aqoonsiga, labada dhinac ayaa yeeshay wada-hadal ku saabsan horumarinta xiriirka laba geesoodka ah iyo xoojinta iskaashiga dhinacyada muhiimka u ah labada dowladood. Waxay si gaar ah diiradda u saareen arrimaha siyaasadda, dhaqaalaha, waxbarashada, amniga iyo iskaashiga heer gobol iyo heer caalami.
Safiir Yusuf Ahmed Hassan ayaa Madaxweynaha Mauritaaniya uga mahadceliyay soo dhoweynta diirran iyo taageerada joogtada ah ee dowladda Mauritaaniya ay la garab taagan tahay Soomaaliya, isagoo xusay in Dowladda Federaalka Soomaaliya ay muhiimad gaar ah siineyso xoojinta xiriirka diblomaasiyadeed iyo iskaashiga dalalka Islaamka iyo kuwa Afrika.
Dhankiisa, Madaxweyne Mohamed Ould Cheikh El Ghazouani ayaa adkeeyay sida dowladda Mauritaaniya uga go’an tahay sii wadidda xiriirka walaaltinimo iyo taageerada ay siiso Soomaaliya, gaar ahaan dhinacyada nabadda, xasilloonida iyo horumarka.
Magacaabista iyo aqoonsiga rasmiga ah ee Safiirka cusub ayaa kusoo aadaya xilli Soomaaliya ay sii xoojineyso xiriirka diblomaasiyadeed ee ay la leedahay dalalka gobolka iyo caalamka, iyadoo dowladda Federaalka Soomaaliya ay dadaal ugu jirto ballaarinta iskaashiga siyaasadeed iyo dhaqaale ee ay la leedahay saaxiibadeeda caalamiga ah.
