Muqdisho, Soomaaliya – Madaxweyne Xasan Sheekh Maxamuud, oo casho sharaf u sameeyay culimada Soomaaliyeed ee ka qeyb galay Shirweynihii Labaad ee Culimada Soomaaliyeed, ayaa carrabka ku adkeeyay muhiimadda weyn ee midnimada culimada si loo gaaro midnimo qaran oo waarta.
Madaxweyne Xasan Sheekh ayaa soo dhaweeyay warbixinta ka soo baxday Shirweynaha Culimada, wuxuuna ku booriyay culimada inay xoojiyaan midnimadooda si loo adkeeyo midnimada Soomaaliyeed. Wuxuu uga mahadceliyay taageerada joogtada ah ee ay siiyaan dowladda iyagoo ilaalinaya diinta, dhaqanka, iyo nolosha muwaadiniinta Soomaaliyeed. Sidoo kale, wuxuu ku dhiirrigeliyay inay sii wadaan door muhiim ah oo ay ku hagayaan qaranka, xoojinayaan dowladda, horumarinayaan bulshada, iyo wacyigelinayaan dadweynaha.
“Culimada Soomaaliyeed waa hoggaamiyeyaasha qaranka waxaana laga filayaa inay dadka ku hogaamiyaan nabad, amni, iyo maamul wanaag. Nabadda, midnimada, iyo horumarka shacabka Soomaaliyeed waxay ku xiran yihiin midnimada Culimada Soomaaliyeed,” ayuu yiri Madaxweyne Xasan Sheekh.
Madaxweynuhu wuxuu sidoo kale ku booriyay culimada inay kordhiyaan dadaalkooda ku aaddan la dagaallanka Khawaarijta iyo ka hortagga afkaarta xunxun ee ay faafinayaan, iyagoo doonaya inay dib u mideeyaan bulshada Soomaaliyeed ee ay kala geeyeen dagaalada sokeeye.
Baaqan wuxuu muujinayaa sida uu Madaxweyne Xasan Sheekh ugu heelan yahay in la xoojiyo midnimada iyo xasilloonida Soomaaliya iyada oo la kaashanayo hoggaanka iyo wada shaqeynta culimada Soomaaliyeed.
_____________________________________________________________________________________Xafiiska Wararka Qaranimo Online | Mogadishu, Somalia
_____________________________________________________________________________________Advertisement
_____________________________________________________________________________________
|
|
|
|
